Li walon d\'èmon nos-ôtes

forum pou lès dgins qui vwèyenu voltî leu lin.we
 
AccueilPortailFAQRechercherS'enregistrerMembresGroupesConnexion

Partagez | 
 

 Ernest Benoit

Voir le sujet précédent Voir le sujet suivant Aller en bas 
AuteurMessage
lucyin



Masculin Nombre de messages : 603
Age : 63
Localisation : Sidi Smayl Marok
Date d'inscription : 01/08/2006

MessageSujet: Ernest Benoit   Lun 7 Jan - 11:12

http://wa.wikipedia.org/wiki/E._Benoit

Lu trö du bouc

Lu long du tch'min ki va d'Anlè a Tchonvî, i gn-è ène andrwa k'on loume lu Tro du bouc. A pôrt ène pitite dènivèlâcion, i gn-è rin d' bin difèrant dins l' payisadje, èt pourtant, i s'î ôrot passé ène ètranje istwâre avu l' Joseph Mathieu du Tchonvî èt Belzébuth.

Lu Joseph n'avot vrêmint pont oyu d'chance ç't-ènnée là; ène walée d' gurzê avot tumé su Tchonvî, adon lès trwâs kârt du s' swâye èt du s'n-avon.ne avint sté ravadjés. La tounwâre lî avot touwé ène bèle djuni plin.ne, èt sa grègne avot pris feu. Lu rnôd lî avot scroté chîs bèles pouyètes. Sès deûs pus bèles vatches avint tapé l'vê; il astot vrêmint duscouradjé l' Joseph.

La tiêsse a bachète, v'là Joseph voye a Anlè d'mander d' l'êde a s' cousin; mês il astot a po près chûr du n' rin awèr; lu cousin en kèstion èstot counu avâre come in peû : il avot l' keûr ossi sètche k'in cöp d' trike. Joseph routot an marounant, côsant tout seû : «Fôt-i ku l'diâle s'è mèle pou 'nn-ariver là; ça n'su put nin ôtrumint ». Tout d'in cöp, vou l' là tout sbaré : i gn-avot kékin ki routot a costé d' li; c'èstot èn-ètranje pèrsonâje avu in tint gris sèris èt dès oûys roudjes come dès bréjes. I tirot padrî li, ou d'bout d'in loyin, ène drole du biêsse k'avot la tiêsse d'in bouc èt l' cwârp d'èn-ome avu dès grands vèrt poyes; èt pad'zous lès poyes, on z-ôrot polu d'viner dès pènâs.

Lu Joseph n'èstot nin trop chûr, lu vèrbouc v'lot a tout momint l'suker. Lu pèrsonadje ki l' avot a costé lî dit : « Vos rwêtez ma bèle biêsse don l'ome, èt bin volà ène boûsse rimplîe d'or, èle èst pour vos, si v' savez m' dire li nom du ç't-animal là, û bin si v's-amon.nez ène biêsse pu drole ku ça èt ku dj' n'arivrot nin a ruc'nuche». Lu Joseph s'è ravisé, il è bin veût k'il avot a fwêre ou malin, lu dèmon vlot lî djouwer in môvês toûr. «Dju n' sét nin ç'ku v's-avez là pou ène biêsse », ruspond l'Joseph, « Mês dju pu v' dîre ku pou l' coûtcher du solê, dju v's-amon.nrê ène biêsse télmint drole, ku v's-î pièrdrez vosse latin èt bin chûr, vosse boûsse ! »

Lu diâle, chûr du li, riyot a plin.ne gwâtche : « Pari t'nu! » di-st-i, « Mês si vos pièrdez, dju v's-antrin.ne avu mi dins lès anfêrs. »

Joseph racoure vitmint a Tchonvî, addlé la Fifine sa fame, èt lî conte l'istwâre k' i v'not d'awèr, an 'nn-alant a Anlè, èt l' pari k' i l'avot fwèt avu l'diâle.

« Mon Diu Joseph, on n' è nin co oyu dès miséres assez ? Èt vos alez co fwêre dès paris! Èt si vos pièrdez, kèsku dj'va fwère, mi ? Dju n'vu nin aler an anfêr savez, mi ! »

«I n'èst nin kèstion d' piêde, ni co d'aler an anfêr. I nos fôt trovu in plan.»

Èt vou lès la a tûzer tous lès deûs al toursiveûserîe k'il alint djouwer ou diâle èt ki n'î wérot k' du feu. Fifine in po rachûrée su prète ou djeu; kè ç' k'èle nu fros nin pou ku s' Joseph nu vâche nin dins lès anférs.

Joseph è duschindu in grand pot du lâme du plantchî èt ossi in bé duvèt d' plumes d'oyes. I tchabore la Fifine avu l' lâme partout su l' cwârp èt avu s' couté d' potche i droûve lu duvèt; pwîs roûle la Fifine dins lès plumes jusk'a ç' k'on nu wèt pus rin du cwârp da Fifine. Su la tiésse, i lî amantche la pé d'ène tièsse du bû avu lès cwan.nes k'il è bin oyu sougne du tchaborer d' lâme èt toûrner dins les plumes. Joseph tôune deûs trwâs cöps ôtoûr du s'chèf d'eûve pou vèy si gn-avot rin ki clotche, vou lès là fins prèts.

Pou n' nin atirer l' bôcadje dès vèjins i passront pô drî dul môjon a travièrs lès pachis èt an chûvant lès hâyes. An coûr du route, il ont bin rascontré l' grand Nestor, l'inocint du viâdje, ki n'raconte jamwés k' dès carabistouyes; person.ne nu crwâs jamwés çu k'i dit; èt du toute façon, kand il è veût la biésse, il è pèté ô diâle come in lîve k'è lès tchins a sès trousses.

A l' sortie du bwès, i wèyèt ku l' diâle èstot djà là ki pèstulot. « On wèt bin k'i n'è rin a fer », di-st-i Joseph, alörs come convnu, Fifine pou sortu du bwès, su mèt a kate pates, èt k'mince a zoupler come in lapin èt an min.me timps, bawot come in chèvreû.

Arivés a l'place convnue, lu salé èstot ô trwâs kart catché. Belzébuth toûne ôtour du fènomin.ne, an s' grètant l'minton; i fwét trwâs kate toûrs. On n' wèt pus l' salé, lu diâle su raprotche pus près èt vut r'nifler l'odeûr; més i r'çie in cöp d' cwan.ne pad'zous l' nez, çu ki lî fwèt pousser in grougnmint d' douleûr. I r'toûne co ôtour, i stind sès crawiyus dègts pou tâter l' fénomin.ne. Més adon, c'èst l' Joseph ki lî tape in cöp d' baston su lès dègts « Bas lès pates » di-st-i l'Joseph « èsku dj'ê pougné dins vosse biêsse mi ? »

Lu diâle aradjé, mwés, il avot l' bôcadje mèchant a fwère peûr, è tapè la boûsse ôs pîds da Joseph èt c'èst en poussant dès cris du malédiccion ku Belzébuth è r'moussé dins s' trö. "Lu Trö du Bouc".

I f'jot nut' kand l' Joseph èt la Fifine sont rintrés a Tchonvî bin binôje d'awèr gangné leû pari èt d'awèr djouwé in bon tour ou diâle. Il ont polu: r'bâti la grègne èt r'gârni lu stôle èt la pouytrîe. Lès djins d' Tchonvî su d'mandint bin comint Joseph avot fwèt pou s' rulver si vite; més ni Joseph ni Fifine n'ont jamés rin dit. I gn-è kand'minme èn-ome k'è counu l'istwâre c'est l' vî curé, més il è ôrdé lu scrèt. Dins l'fond, c'èstot in pô lu scrèt d' keufèssion.

Kand Joseph è oyu fini du r'bâti, Fifine è invité l'curé pou bèni la cînse; lu vî curé ossi su d'mandot bin comint l' Joseph avot fwét; èt il è dandjî d' sawèr, kand il è sté bèni la novèle grègne. Il î è sté a l' fin du l'djournée, kand Joseph èt Fifine ont fwèt l'ovradje, èt il avot pris avu li ène boutîe du s' mèyeû vin. I n'èstint nin co a l'mitan du l' boutîe, ku l'curé counuchot lès trwâs kârt du l'istwâre. Lu sint-ome riyot télmint ku lu scapulêre, pindu a s' cö, avu la crwâs d' Jésus, lî dandinot su l' vinte. I gn-avot nolu a dire, si c'èstot Jésus an riyant ki f'jot hicter l' vinte du curé, û bin l' vinte du curé ki f'jot rire Jésus. Dju crwas k' il avint brâmint du plêji tous lès deûs a choûter l'istwâre du tour ku Joseph èt Fifine ont djouwé a Belzébuth.

La Fifine du s' costé èstot in po rapôjée, d'awèr raconté ça a s' bon vî curé. I lî san.not ku c'èstot dès sous gangnés malonêtmint, mês l'sint-ome lî è dit: « Vos p'lez aler an pê, lu bon Diu v's è d'né l'absolussion, èt dju crwâs bin k'il èstot in pö d' conivance, èt k'i v's è d'né in bon côp d' mwin pou djouwer in toûr parèy a s' concurant. »

Lu curé n'è jamés dèvwalé l'istwâre a sès parwasyins, més il avot scrît dins s' pitit calpin. Çu n'èst k' dès ènnées èt dès ènnées après, i gn-avot pus nolu ki c'nuchot l'egsistance du Joseph èt Fifine, k'in sucsèsseûr du vî curé d' Tchonvî, an r'nètiant l' geurnî du l' cûre, è r'trovu l'manuscrit.

Èt c'èst come ça, k'on counu l'orijine du Trö du bouc.

-----
Scrît an walon du Viance, d'après mémwâre, lu 17 du novembe 2000.

(ö = sicrijhedje CIDWEL pol betchfessô ô)

http://wa.wikipedia.org/wiki/Betchfess%C3%AE_%C3%B4

http://wa.wikipedia.org/wiki/CIDWEL
Revenir en haut Aller en bas
Voir le profil de l'utilisateur http://aberteke.org
 
Ernest Benoit
Voir le sujet précédent Voir le sujet suivant Revenir en haut 
Page 1 sur 1
 Sujets similaires
-
» anniversaire ernest motte
» Benoit Morin
» Joannie Benoit - On m'a amputée d'une jambe à 16 ans.
» COLONEL benoit DESMEULLES
» Osso Bucco italien de Jehanne Benoit

Permission de ce forum:Vous ne pouvez pas répondre aux sujets dans ce forum
Li walon d\'èmon nos-ôtes :: Scrijeûs(e)s-
Sauter vers: