Li walon d\'èmon nos-ôtes

forum pou lès dgins qui vwèyenu voltî leu lin.we
 
AccueilPortailFAQRechercherS'enregistrerMembresGroupesConnexion

Partagez | 
 

 Schoovaerts / Macsense Robert

Aller en bas 
AuteurMessage
lucyin



Masculin Nombre de messages : 636
Age : 64
Localisation : Sidi Smayl Marok
Date d'inscription : 01/08/2006

MessageSujet: Schoovaerts / Macsense Robert   Mer 5 Mar - 9:54

(slam)

DJI VOS L’ CRÎYE

Qwè m’ fauréve-t-i don fé ?
Èm´ trover on stocasse poûssant, l’ prinde po maîsse ? Divenu rampioule, po-z-awè mès-aujes, m’è fé ène sitapète, lî lètchî si scwace ? Griper pa rûje èt nén à fwace ?
Nèni, m’ fi !
Èn´ ponde mès oûves, come bran.mint dès flateûs, qu’è l’ oneûr dès caurlés ? Èm´ candjî a craqueû, awè ausse di vîr dissu lès lèpes d’on minisse afîye èskèpiyî on sorîre nén trop bladjot ?
Nèni, m’ fi !
Disdjuner tos lès djoûs d’on poria, awè mès solés atènis pa lès trotes ? Li pia d’ mès gngnos, dès asglignâdjes, tofêr mannète ? Fé dès toûs, cobèrôler, ployî m’n-anète ?
Nèni m’ fi !
D’ène mwin, carèssî l’ cu d’ène gade, do tins qu’ l’ôte chouve sès flates ? Doner do pilé aus ratindeûs d’ rubâbe ?
Nèni m’ fi !
Èm´ daurer d’ choû è choû, faûs pilâte, djouwer au ptit grand-y-ome dins ène cabûsète ? Èm´ rècrèster à l’ pus ptite risète ?
Nèviyî, avou dès flates po rames, gonfèler mès vwèles dès sospîrs di m’ vîye mame ?
Nèni m’ fi !
Amon èn-èditeû à tchêr pris, payî gros po m’ fé èplaîdi ?
Nèni m’ fi !
Èm´ fé batîjî soçon dins dès conciles raploûtés au fond d’on staminèt pa dès stornés ?
Nèni m’ fi !
Èm´ volu bâti on nom, mi, à scrîre dès couyes dins on powin.me ? Nén por mi ! Trover do bon dins lès canlètes ? Awè sogne dès èradjîs èt d’ leûs gazètes ? Sins manque mi dîre : « Èl vous´ wadjî, dji va ièsse bistoké d’on bia papî » ?
Nèni m’ fi !
Carculer, blèmi, tron.ner minme, fé d’ pus d’ complimints qui d’ powin.mes, twârtchî dès priyâdjes, èm´ volu fé r’comander ?
Nèni m’ fi !
Mins m’ pormwinrner, tchanter, sondjî, rîre, passer oute, tot seû, ièsse libe ! Awè m’n-ouy qui rwaîte drwèt, sins bribe !
Mète, come djèl vous, mi casquète di truviè. Po èn-oyi, po on non.na, m’ènn’ aler tot rwèd ! Ovrer po m’ plaîji, sins cwêri l’ fortune. Lèyî lès mau-plaîjants bwêrler à l’ lune. Ni scrîre mauy ène saqwè qui n’ mi rafîye. Modèsse, mi dîre, ça va p’tète ièsse bon, quéquefîye. Contint d’ mès fleûrs, di mès frûts, di mès fouyes, tchôd moudus, foû di m’ corti, di m’ bèrdouye.
Si m’arive d’awè dès trionfes, d’astchèyance, èle ni m’a nén tchèyu d’ Cèsâr, mi tchance. Di tot, dji vous waurder à mi-minme li mèrite. C’èst d’ mès canadas qui dji côpe mès frites.

Poqwè dimèrer l’ colouteûse rampioule quand on n’èst ni pus tchin.ne qui tchiperoule ? Èn´ nén griper bén wôt, p’tète, mins tot seû. Èn´ rén duvu à on caurleû poûssant. Mêrseû ? Oyi, conte tèrtos, si m’ lès faut èvoyî au diâle, après awè ranchî èt n’î pont trover d’ lwèyâl.
N’awè d’ fiyâte qui dins mès in.n’mis, à fwace di n’ vôy si raploûter qu’ dès faus-amis. Rîre di cès mwaîs soçons, aclapés come mwatès fouyes, qui d’ leûs bokes èprustêyes aus cus dès pouyes n’ mi lancenut qui sournwès saluts.
Dj’a plaîji d’ criyî : on in.n’mi d’ pus ! Èwarant ? Et bén oyi, da, c’èst là m’ vice, displaîre èst m’ plaîji, dj’ in.me doner l’ pèrvisse.

Vîs buks, si vos savîz come on s’ rècrèsse quand lès grandiveûs vos r’waîtenut d’ crèsse. Dji lèye rider dissu m’ casaque lès r’glatantès tatches dès glètes dès inviyeûs, lès blèfâdjes dès laches.
L’ fwârtchîye amichtauveté qu’on vos stind richène à cès tènès stapètes èskètêyes pau pus ptit vint. Lès pinsîz stocasses ? Eles sont tchamoussêyes do keûr. Pont d’aspouye, èles vont tchaîre avant lès fleûrs. Ca is n’ont nén l’ front d’ tinu, pont di lwè, is vont abandener, clincî, di tos costés, sins fwè.
Leû in.ne, tos lès djoûs, m’ dispiète èt m’ ridrèsse, leûs ratchons m’ faîynenut ridrèssî m’ tièsse. Chaque in.n’mi d’ pus m’èst on novia bordon, on radjou d’astok po mia roter on pîd pus lon.



Qwè m’ fauréve-t-i don fé ?
Èm´ trover on stocasse poûssant, l’ prinde po maîsse ?
Divenu rampioule, po-z-awè mès-aujes, saîs´ ?
M’è fé ène sitapète, lî lètchî si scwace ?
Griper pa rûje èt nén à fwace ?
Nèni, m’ fi !
Èn´ ponde mès oûves, come bran.mint dès flateûs,
qu’è l’ oneûr dès caurlés ? Èm´ candjî a craqueû ?
Awè ausse di vîr dissu lès lèpes d’on minisse
afîye èskèpiyî on sorîre nén fwârt riyisse ?
Nèni, m’ fi !
Disdjuner tos lès djoûs d’on poria ?
awè mès solés atènis pa lès trotes ? Li pia
d’ mès gngnos, dès asglignâdjes, tofêr mannète ?
Fé dès toûs, cobèrôler, ployî m’n-anète ?
Nèni m’ fi !
D’ène mwin, carèssî l’ cu d’ ène gade,
do tins qu’ l’ôte chouve sès flates ?
Doner do pilé aus ratindeûs d’ rubâbe ?
Nèni m’ fi !
Èm´ daurer d’ choû è choû, faûs pilâte,
djouwer au grand ptit-y-ome dins ène cabûsète ?
Èm´ rècrèster à l’ pus ptite risète ?
Nèviyî, avou dès flates po rames,
gonfèler mès vwèles dès sospîrs di m’ vîye mame ?
Nèni m’ fi !
Amon èn-èditeû à tchêr pris,
payî gros po m’ fé èplaîdi ?
Nèni m’ fi !
Èm´ fé batîjî soçon dins dès conciles
raploûtés au fond d’on staminèt paus ratcheûs d' bile ?
Nèni m’ fi !
Èm´ volu bâti on nom, mi,
à scrîre dès couyes dins on powin.me ? Nén por mi !
Trover do bon dins lès canlètes ?
Awè sogne dès èradjîs èt d’ leûs gazètes ?
Sins manque mi dîre : « Èl vous´ wadjî,
dji va ièsse bistoké d’on bia papî » ?
Nèni m’ fi !
Carculer, blèmi, tron.ner minme,
fé d’ pus d’ complimints qui d’ powin.mes,
twârtchî dès priyâdjes, èm´ volu fé r’comander ?
Nèni m’ fi !
Mins m’ pormwinrner, tchanter,
sondjî, rîre, passer oute, tot seû, ièsse libe !
Awè m’n-ouy qui rwaîte drwèt, sins bribe !
Mète, come djèl vous, mi casquète di truviè.
Po èn-oyi, po on non.na, m’ènn’ aler tot rwèd !
Ovrer po m’ plaîji, sins cwêri l’ fortune.
Lèyî lès mau-plaîjants bwêrler à l’ lune.
Ni scrîre mauy ène saqwè qui n’ mi rafîye.
Modèsse, mi dîre, ça va p’tète ièsse bon, quéquefîye.
Contint d’ mès fleûrs, di mès frûts, di mès fouyes,
tchôd moudus, foû di m’ corti, di m’ bèrdouye.
Si m’arive d’awè dès trionfes, d’astchèyance,
èle ni m’a nén tchèyu d’ Cèsâr, mi tchance.
Di tot, dji vous waurder à mi-minme li mèrite.
C’èst d’ mès canadas qui dji côpe mès frites.

Poqwè dimèrer l’ colouteûse rampioule
quand on n’èst nén pus tchin.ne qui tchiperoule ?
Èn´ nén griper bén wôt, p’tète, mins tot seû.
Èn´ rén duvu à on caurleû poûssant. Mêrseû ?
Oyi, conte tèrtos, si m’ lès faut èvoyî au diâle,
après awè ranchî èt n’î pont trover d’ lwèyâl.
N’awè d’ fiyâte qui dins mès in.n’mis,
à fwace di n’ vôy si raploûter qu’ dès faus-amis.
Rîre di cès mwaîs soçons, aclapés come mwatès fouyes,
qui d’ leûs bokes èprustêyes aus cus dès pouyes
n’ mi lancenut qui sournwès saluts.
Dj’a plaîji d’ criyî : on in.n’mi d’ pus !
Èwarant ? Et bén oyi, da, c’èst là m’ vice.
Displaîre èst m’ plaîji, dj’in.me di les rinde djivisse.

Vîs buks, si vos savîz come on s’ rècrèsse
quand lès grandiveûs vos r’waîtenut d’ crèsse.
Dji lèye rider dissu m’ casaque lès r’glatantès tatches
dès glètes dès inviyeûs, lès blèfâdjes dès laches.
L’ fwârtchîye amichtauveté qu’on vos stind
richène à cès tènès stapètes èskètêyes pau pus ptit vint.
Lès pinsîz stocasses ? Eles sont tchamoussêyes do keûr.
Pont d’aspouye, èles vont tchaîre avant lès fleûrs.
Ca is n’ont nén l’ front d’ tinu, pont di lwè,
is vont abandener, clincî, di tos costés, sins fwè.
Leû in.ne, tos lès djoûs, m’ dispiète èt m’ ridrèsse,
leûs ratchons m’ faîynenut ridrèssî m’ tièsse.
Chaque in.n’mi d’ pus m’èst on novia bordon,
on radjou d’astok po mia roter on pîd pus lon.


Cåzaedje : Djozé Schoovaerts
Dijhaedje : Macsence Robert
2inme pris al bate « on scrijheu / on djheu » Mont, e moes d’ decimbe 2013.
ås scoles di Bive do 4 di måss 2014
Revenir en haut Aller en bas
Voir le profil de l'utilisateur http://aberteke.org
 
Schoovaerts / Macsense Robert
Revenir en haut 
Page 1 sur 1
 Sujets similaires
-
» Robert EUDE, historien Seinomarin.
» Robert Gogoi a-t-il été à bord du Gerlache ?
» Documentaire sur Robert Bruce. ARTE.
» Bon anniversaire Robert !
» ROBERT x GOHIER - Le Havre Graville

Permission de ce forum:Vous ne pouvez pas répondre aux sujets dans ce forum
Li walon d\'èmon nos-ôtes :: Tchansons èyèt parôles-
Sauter vers: