Emile Pècheur

Pådje do scrijheu so Wiki

http://wa.wikipedia.org/wiki/E._P%C3%A8cheur

Lu tièstu ptit couchèt.

(conte po ls èfants)

Dju vnè a pon.ne du scrîre lu tchanson du Bikète, k’an fouiytant on vî lîve d’hitwâres po èfants (1925) dju tume so l’histwâre do Tièstu ptit couchèt ki rson.ne fwârt a l’ cile du Bikète.

One pètite vîe fème, ki vikèt tote seûle dins one môjon an bwès o cwin dol grande pature a l’intrée do grand bwès, ramassèt dès coches po alumè s’ feû. Èle troûve one pîce du dîje sous tote noûve dandjreû pièrdue pa on pormineû ou on tourisse.

Kw’ èst-ce ku dju frè bin avou çu pîce la ? Dju va n’n’alè al fwâre o Bork èt dj’î achtrê on ptit couchèt.

Come dit, come fêt, èle va al fwâre èt atchète on ptit couchèt.
Po rintrè dins l’ pature d’où ç’ ku s’ môjon èstèt, i gnavèt one borîre ku l’ pètit couchèt nu vout nin passè.

Èle lêt lu ptit couchèt la èt on pon pus long , èle rasconture on tchin èt èle lî dit :Tchin, vènéz on pon avou mi po agnè lu ptit couchèt ku dj’ê achtè èt ki n’ vout nin pasè l’ bôrîre. Dju n’ rarivrêt nin al môjon avant l’ nwâre nut’. Mês l’ tchin nu vout nin agnè lu ptit couchèt.

Èle lêt lu tchin la èt on pon pus long, èle rasconture on baston èt èle lî dit : Baston, vènéz on pon avou mi po bate lu tchin, ki n’ vout nin agnè lu ptit couchèt, ki n’ vout nin passè l’ bôrîre. Dju n’n’rarivrê nin al môjon avant l’ nwâre nut’. Mês l’ baston nu vout nin bate lu tchin.

Èle lêt lu baston la èt on pon pus long, èle rasconture on feû èt èle lî dit :Feû, vènéz on pon avou mi po brûlè l’ baston, ki n’ vout nin bate lu tchin, ki n’vout nin agnè lu ptit couchèt, ki n’ vout nin passè l’ bôrîre. Dju n’rarivrê nin al môjon avant l’ nwâre nut’. Mês l’ feû nu vout nin brûlè l’ baston.

Èle lêt lu feû la èt on pon pus long, èle rasconture du l’ êwe èt èl lî dit : Êwe, vènéz on pon avou mi po dustinde lu feû, ki n’ vout nin brûlè l’ baston, ki n’ vout nin bate lu tchin, ki n’ vout nin agnè lu ptit couchèt, ki n’ vout passè l’ bôrîre. Dju n’ rarivrê nin al môjon avant l’ nwâre nut’. Mês l’ êwe nu vout nin dustinde lu feû.

Èle lêt l’êwe la èt on pon pus long, èle rasconture on vê èt èle lî dit : Vê, vènéz on pon avou mi po bwâre l’êwe, ki n’ vout nin dustinde lu feû, ki n’ vout nin brûlè l’ baston, ki n’ vout nin bate lu tchin, ki n’ vout agnè lu ptit couchèt, ki n’ vout nin passè l’ bôrîre. Dju n’ rarivrê nin al môjon avant l’ nwâre nut’. Mê l’ vê nu vout nin bwâre l’ êwe.

Èle lêt lu vê la èt on pon pus long, èle rasconture on botchî èt èle lî dit :Botchî, vènéz on pon avou mi po touwè l’ vê, ki n’ vout nin bwâre l’ êwe, ki n’ vout nin dustonde lu feû, ki n’ vout nin brûlè l’ baston, ki n’ vout nin bate lu tchin, ki n’ vout nin agnè lu ptit couchèt, ki n’ vout nin passè l’ borîre. Dju n’ rarivrê nin al môjon avant l’ nwâre nut’. Mês lu botchî nu vout nin touwè l’ vê.

Èle lêt lu botchî la èt on pon pus long, èle rasconture one cwade èt èle lî dit : Cwade, vènéz on pon avou mi po pinde lu botchî, ki n’ vout nin touwè l’ vê, ki n’ vout nin bwâre l’ êwe, ki n’ vout nin dustinde lu feû, ki n’ vout nin brûlè l’ baston, ki n’ vout nin bate lu tchin, ki n’ vout nin agnè lu ptit couchèt, ki n’ vout nin passè l’ bôrîre. Dju n’ rarivrê nin al môjon avant l’ nwâre nut’. Mês lu cwade nu vout nin pinde lu botchî.

Èle lêt lu cwade la èt on pon pus long, èle rascontyre on rat èt èle lî dit :Rat, vènéz on pon avou mi po rognè l’ cwade ki n’ vout nin pinde lu botchî, ki n’ vout nin touwè l’ vê, ki n’ vout nin bwâre l’ êwe, ki n’ vout nin dustinde lu feû, ki n’ vout nin brûlè l’ baston, ki n’ vout nin bate lu tchin, ki n’ vout nin agnè lu ptit couchè, ki n’ vout nin passè l’ bôrîre. Dju n’ rarivrê nin al môjon avant l’ nwâre nut’. Mês lu rat nu vout nin rognè l’ cwade.

Èle lêt lu rat la èt on pon pus long èle rasconture on tchèt èt èle lî dit :Tchèt, vènéz on pon avou mi po mougnè lu rat ki n’ vout nin rognè lu cwade, ki n’vout nin pinde lu botchî, ki n’ vout nin touwè lu vê, ki n’ vout nin bwâre l’êwe, ki n’ vout nin dutinde le feû, ki n’ vout nin brûlè l’ baston, ki n’ vout nin bate lu tchin, ki n’vout agnè lu ptit couchèt, ki n’vout nin passè l’ bôrîre. Dju n’rarivrê nin al môjon avant l’ nwâre nut’. Mês lu tchèt k’a sè î mèt dès condicions.

Vos vèyéz lu vatche atatchée o pikèt ? Su lontche èst trop coûte po arivè al mon.ye du foûr. Si vos lî pwartéz do foûr, èle su lêrèt mode, vos m’apwartréz lu lèsè èt cand dju l’ ôrê beû, dju mougnrê l’ rat.

Nosse pètite vîe fème court pwartè do foûr al vatche ki vout bin su lèyi mode, èle apwate lu lèsêt o tchèt ki l’ beût…èt tot si vite court après l’rat.
La tso, lu rat vout bin rognè lu cwade, lu cwade vout bin pinde lu botchî, lu botchî vout bin touwè l’ vê, lu vê vout bin bwâre l’ êwe, l’ êwe vout bin dustinde lu feû, lu feû vout bin brûlè l’ baston, lu baston vout bin bate lu tchin, lu tchin vout bin agnè lu ptit couchèt, lu ptit couvhèt vout bin passè l’ bôrîre.

Lu ptite fème èt lu ptit couchèt ont rarivè al môjon avant l’ nwâre nut’.

Dins l’ min.me lignée, i gn’ a co lu fabliô do Leû ki n’ vout nin sôrti do bwès.

Les pénitances a scole.

Avant du côzè dol sucole, raplans k’al môjon, i gn’ avèt d’dja des punicions. Çu n’èstèt nin bin mèchant : i gn’avèt l’cwin èt o pîre lu fèsséye. Ça s’tèrminè sovint pa des calins sol choûr dol moman k’avèt oyu tot si mô, si nin d’pus, ku s’pètit. Ôdjoûrdu, on vèt sovint dins les gazètes des istwâres avou des pôves pètits ki s’fant dranè pas des péres ou des méres sins keûr ki n’mèritant nin d’vikè. I gn’a min.me des cis ki les touwant. Pokwè ç’k’on les z’î fè nin ostant, dins nosse sociètè duvnue pèrmisîve èt humanizéye, come on dit ???

Cand dj’èstès ptit dj’atindès sovint mu pére èt les cis du s’ t’ âdje cozè des mêsses k’ils avint oyu a scole cand ils estins gamins. Mu pére fèt partîe des cis ki n’alint a scole ku tins d’ l’ îvyinr cand i gn’avèt dol nîve èt ku lès travôs dins les tchamps èt dins les bwès èstint finis po l’ anéye. Come i fèt fwa, ils avint chacun one chune du bwès, po alimantè lu stûve, o dzo do brès dwa èt lu scaye èt l’touche dins on ptit satche dins l’onte mwin. Les classes èstint grosses tins d’ l’ ivyinr, todis du pus d’ carante èfants, èt po s’fére choûtè des mêsses amployint lu maniére fwate. On lumèt ça aplikè l’ férule do nom dol pénitance k’èczistèt dins totes les scoles do tins k’èles fint pârtie des monastères avou les cours donè pô mwanes. One férule c’èstèt one plake du cûr ou du bwès ku les mêsses avint po bouchè so les pômes des mwins des cis ki vlint puni. An Angletêre, lu scorîe estèt pindue addé l’tablô èt t’avès dwa a ostant côps par fôtes, c’est bin spécifyè dins one lisse ki pind a costè dol sucorîe. Cand l’ férule a stî dusfindue, les mêsses prindint one plate règue po bouchè so plat des mwins, ça fèt bramint do bru mês ça n’ fèt nin fwârt mô. Les pus mèchants des mêsses bouchint sol dos dol mwin, èt les « crapuleûs » bouchint sol dos dol mwin avou one régue carée.

Tins dol guère, dj’èstès dins one colonie po les èfants des vayes ki crèvint d’ fwin. Après l’ guère l’institut a continuwè lontins. O réfèctwâre, chake mêsse avèt one tâbe du doze èfants èt so l’èstrade dj’avins on djon.ne curè. Il avèt passè an angletère an carante èt avèt dèbarkè an carante cate avou l’ brigade Piron, do nom du leû comandant. Dj’ avès les grands dol chîjime anéye. On djoû, lu djon.ne curè punit onke du mes èlèves èt po fére one èczambe, i fêt vnu l’ gamin so l’èstrade addé li, i print one régue caréye èt i bouche on fwâr côp so l’ dos dol mwin stindue do gamin. Dj’opule foû du m’ chéze come on djâle foû d’ on bènitî, dju vore so l’èstrade èt dju dis tot bas à l’oraye du m’ préfèt, lu djon.ne curè, fwâr mèchamint èt fwâr grossiérmint : « Si tu bouches co on côp, t’as m’pougne dins l’ gueûye ! ». I m’a rwètè tot bièsse èt mi dj’ê stî m’rassîr bin pôjîmint. I n’a pus bouchè…Après l’ dinèr , i m’a oukè o burô d’oû ç’ku dj’ons oyu one solide discucion, dju cryins si fwârt cu les vites tron.nint. Dju lî ê dit : « C’est nin pasku t’as stî libèrè les camps dol mwârt des nazis ku tu dès fére come zês. Èt dju prindrês todis lu dèfance d’on gamin du m’ classe si tu l’ bouches. ». Dj’ê mint’nu m’opignon èt m’ dècizion. I n’a jamês pus touchè onke du mes èlèves.
Ruvnant a nos vîs mêsses : mète on gamin dins l’cwin, c’èstèt one djintîye pénitances mês i n’ gn’avèt des pus dures. Dzant an passant ku dj’è n’ê conu onk ki fèt ça an dzant avou ç’ki cwayè d’ l’ umoûr: « Va mode les aragnes dins l’ cwin ! ». On ptit d’prumîre anéye avèt télmint peûr des aragnes ki tchulè po n’nin î alè.
Onk des mêsses prindèt les èfants pô z’ orayes ou bin pô tchfeûs o dzeû d’l’oraye èt i tirèt fwâr èt les twardèt to an gueûyant des frâzes colèrikes. Ça lî avèt valu on surnom : « l’aracheû d’orayes. »

On djoû on mêsse a foutu on côp d’régue caréye so l’oraye d’onk du prumîre anéye, n’aléz nin m’ cwâre, lu cartilâdje a stî ctayè nèt’ èt lu dzeû d’l’oraye a ployè èt i ploye co. Lu pére du l’èfant a stî a scole èt a foutu one sacréye roufe o Frére an kèstchon.

I gn’avèt les cis ki mètint les gamins a gngnos so l’èstrade, pus fwâr is les mètint a gngnos so one régue caréye, co pus fwâr, is les oblidjint a mète les brès an cwa, co bramint pus fwâr is mètint on gros lîve so chacune des mwins an cwa. Imjinéz-v’ on’ èfant a gngno so l’èstrade avou one régue caréye o dzo des gngnos, avou les brès an cwa èt on gros lîve so chake mwin. Si ç’n’est nin ça dol torture, duzéz-m’ çu ku c’est !

An prumîre moyène, lu Frére Dirècteûr avèt on mantche du breûze ki lumèt Azor. I mènassèt sovint mês so one anéye passéye addé li dju n’ ês vèyu k’on’ èlève passè les roufes. C’èstèt l’ valèt do juche du pês k’avèt stî ôs pomes amon les Sœurs. Dju cwas ku si ça n’avèt nin stî l’valèt do juche du pês, il ôrèt oyu one pinicion min fwate.

Dj’èstins an twazime moyène, dj’avins kinze ans. Deûs sèc’cions dins nosses classe : lu mitan an tèknike èt l’onte mitan an moyène. Prumîre luçon do londi matin : rulijyion. Après les tèknikes duch.chindint ôs ateliérs èt les moyènes passint al rèssitacion dol jéomètrîe o tablô. Lu Frére prindèt lu grand compas k’on trassè des ronds o tablô, i l’apougnè do costè dol pike èt dol cron.ye èt avou l’rèsse i bouchè fwâr so les fèsses des cis ki dmorint a stoke. On londi, après on dimagne ku dj’avès mî in.mè d’alè o cinéma ku d’ètudyè m’ jéomètrîe, dj’avès ramassè one solide rouffe, dj’avès min.me tchûlè. Rintrè al môjon, dj’avès télmint mô ku dju n’ savès pus m’assîr. Dj’avès dit pokwè a m’mére. Après avèr ruwètè m’ fondmint a bleus, èle n’avèt fêt ni one ni deûs, èle s’avèt tapè l’ châle so les spales, avèt brokè a scole. Dju n’sés nin ç’ki ça passè, mês pus jamês nolu n’a oyu do « compas » ôs fèsses.

Dins one onte série du punicions, i gn’a les ciles ki falè scrîre. Çant côps « Je dois me taire an classe » - « Je ne peux pas parler wallon » - « Je dois arriver à l’heure » - « Je dois faire mon devoir » - « Je dois me laver les oreilles et le cou » - « Je ne dois pas lancer de boules de neige » - « Je ne dois pas embêter les filles des Sœurs » …Mu pére èstèt bolèdjî. Tos les djoûs a midi, mes deûs fréres èt m’ sœur su duspêtchint du dinè èt dvint alè pwartè do pwin ôs djins ki dmorint o pus long po êdè mu pére a fére su tournéye an l’racourssichant. Onk du mes fréres profitèt d’ ça po ariv è an rtârd. I ramassèt tos les djoûs one punicion à scrîre çant côps. On djoû, lu mêsse èksédè, ravoy mu frére fére su punicion al môjon. « D’oû ç’ku t’vas ? – Lu mêsse m’a ravoyè fére lu punicion al môjon – Kw’èsse ku t’as a fére ? – Çant côps ku dj’dès arivè a l’eûre – Ça c’est bièsse. Sucri lî les tabes du multiplicacion èt pus va lî mostrè » Cand m’frére arive a scole, lu mêsse lî dit ku ç’n’est nin ça ki dvèt fére èt il ravoy co al môjon. Mu pére su fâche. « Va zè rkèr tes cayèts a scole, dumwin t’irès al sucole comunale » Avou lu rcule, dju dis ku m’ pére avèt rêzon.

Cand dj’ê oyu mu diplôme du mêsse du scole, dju m’ê djurè du n’ jamês amployè ces mèchantes bièstrîes la èt dj’ê tni parole…sôf ku du tans z’an tans dj’ê foutu one bafe. Dj’ê min.me on djoû foutu one bafe a m’gamin k’èstèt a scole addé mi èt ça duvant tos les ontes dol classe. Dju l’vès co z’èralè a s’plasse an brêyant èt cincante twas ans après, çu bafe la MU fêt co fwâr mô…li, on djoû ku dj’è cozè d’ça, i m’a dit k’il l’avèt rovyiè.

Dj’inmès mî fére lu contrêre ku les punicions. Dju dnès dès récompances. Dj’avès les ptits : prumîre èt deûzime primêres. Cand vo dnéz classe a one anéye, i fôt ocupè l’onte. Dj’avès one bwasse du ptites boules sures. Cand ça tchipotè on pon, dju choyiè l’ bwasse èt, réflècse da Pavlov, i dvènint djinti come des imôtches pasku, deûs ou twas, tchwèzis dins les pus pôjîs avint dwas a one boule. Onk m’a dit : « Dj’ê stî kèr les minmes amon Marie Louwisse, mês èles nu sont nin si bones »…èt c’est la ku dj’alès les kèr.

Lu dirèctrice des Sœurs, one layike, m’avèt rprotchè du les prinde po vinde…dju lî ê dmandè si èle frèt co scole si al fin do mwès on n’lî vudè nin ses sous ?

Cand dj’ê duvnu chèf du scole, dj’èstins sèt’ : one fème, deûs Fréres èt cat’ layikes. Lu fème èt on’ ome punichint a rlame, a tél pwint k’one moman m’a dit on djoû : « Cand l’gamin rinture a catr’ eûres, dju n’lî dmande pus kwé ç’k’il a come duvwâr, dju lî dmande kwè ç’ k’il a come punicion ». Dju fès réunion lu prumî vinrdi du chake mwès èt dj’avès pris on malin plêji du cmincè an dzant : « Nu rovyiant nin ku l’bon mêsse est l’ ci ki n’ punit jamês »…çu ki m’valèt des ouyades assazines dol fème, on sourire an cwin du l’ome punicheû èt on sourire jusk’ôs orayes des z’ontes.

Mimile Pètcheûr.
Dol Soce des Rcôzeûs d’walon.

Mondializacion èt duslocalizacion.

Vla deûs mots k’on atind tos les djoûs dins les boutches des politikes èt k’on lit tos les djoûs dins les gazètes. Portant vla des anéyes ku çu trim’ tram’ la a cmincè, mês tant ku nos ovrîs avint d’ l’ovrâdje èt ku les comèrces alint bin, nolu nu s’è rtoûrnèt. Les cis k’anoncint les duslocalizacions an dzant ku les patrons kèrint des ovrîs a payè mwince an alant instalè leûs uzines dins des pays des ontes continants so tote lu planète èstint rwètè come des prêtcheûs d’mizére, du malheûr èt des défêtisses ki dzint do djoû çu k’ils avint rêvè dol nut’.

An mil noûf çant catre vint yonk, Liète èt mi, dj’èstins a nos chîjimes vacances an Ardèche. Po nin dmorè tot l’ tins o viyâdje dj’alins avou les bus vizitè les vayes tot ôtoû. Dj’avins dècidè, çu djoû la, du fére mî conuchance avou Annonay ku les documints do çantre do tourisme nos avint rèvèlès come vaye do cûr, des tan’rîes, des solès, des cwabjîes, des papètrîes…èt surtout come lu vaye des fréres Montgolfier, les deûs prumîs a èsse montè an balon tchôfè a l’ êr tchond. Lu vaye les z’îs a fêt on bê monumant ku dj’ê dins mes fotos d’ vacances.

Après avèr sutî dinè dins on ptit rèstôrant, Liète mu dit k’èle vourèt bin des novês èt bês solès pouy k’on est dins lu vaye do cûr èt des cwabjîes. Dju kèrans on bê magazin ki, d’après ç’k’on vèt a l’vitrine, dèt èsse onk des pus mî achalandès do keûr dol vaye. Èle tchwèzit des bês solès sol bleû foncè avou des honts talons, des talons awîes sapince l’onte. Dju lî dis ku come èle a todis les pîds fwas duvant l’ télévizion a l’ hivyinr, dju vons dmandè al vindeûze si èle n’a nin des bons tchonds tchôssons. Siyè dis-t’èle mês c’est dins l’rézèrve pouy ku c’est des tchôssures d’ hivyinr. Èle va voltî al tchambe padrî èt rvint ossi vite avou one brèsséye du tchôssons pus bê onk pus bê l’onte. Liète a do mô a tchwèzi, panche on con a gôtche, on con a dwate…èle mu dmande m’idéye èt dju lî rèsponds k’èle prindiche les pus bês èt les cis k’èle in.me lu mî. Èle a mètu l’ tins mês ça î yè cand min.me arivè. On pon pus tôrd, an mougnant on ptit gatô al pâtisrîe Marmey, dju nos raplans ku lu samin.ne ki vint c’est l’anivèrsêre du nosse bèle faye. Dju sons dins one vaye runomée po ses papètrîes, dju vons bin sûr trovu one bèle cârte. Come d’èfèt, dj’ons trovu ôk du fwârt bê…mês c’n’est nin po rin. Pormi is nos ont vèyu vnus. Cand on n’in.me bin, on n’compte nin.

Rintrès a l’hôtèl, mi, ossi curieûs k’ lèye, dju dusbalans nos achats avou délicatèsse come si dj’avins on trézôr, come des ptits èfants on djoû d’Sint Nicolas. Mês dju vons du surprize an surprize. Les bês solès a talons awîes : made in Brasil, les tchons tchôssons : made in Japan èt l’ bèle cârte po l’anivèrsêre du nosse bèle faye ; made in Gèrmany. Si c’n’èst nin ça dol mondializacion, kw’èst-ce ku c’est ?

Lu londmwin, come tos les djoûs duvè catr’ eûres, Marie-Thèrèze, lu patrone, nos ouke po bwâre one jate du thé èt mougnè on ptit biscwît avou lèye. Dju lî contans l’istwâre du nos achats du swa dizant prodwîs locôs…
Nin ètonant dis’t-èle. Èle nos pôze one duvinète ? Dju dvans advinè d’oû ç’ k’èle a achtè les lapins k’èle a cû po l’ dînèr des « aînés » ( c’èst insi k’is lumant les amis do twazime âdje vola). Dju m’ dis dins mi min.me ku l’rèponse est facile a trovu. Dju v’l’ècsplike : tos les vinrdis do matin, one camionète arive sol pètite place duvant l’ ôtèl èt les cinsîs arivant avou des satchs an jute du dîj, dosse ou kinze djon.nes lapins. Lu martchand les pèsse al romin.ne, les stike dins on grand clapî a lôdjes cron.yes, pus paye les cinsîs k’èrvont tot si vite. C’est po ça ku dju rèspond k’èle les atchète o martchand do vinrdi. Panse tu ,Lulu ! Mes lapins vnant do Paraguay. Come prodwîs do tèrwâre, on n’ fêt nin mî ! A n’ nin cwâre !
Èt co on con, si c’ n’est nin ça lu mondializacion, kw’est-ce ku c’est ?
Raplans nos ku c’èstèt an mil noûf çant catre vint yonk !

Èt les duslocalizacions ? Rin ku dins nosse pètite vaye do Bork, dj’è n’ons conu twas.

Lu sèze octôbe mil hût’ çant nonante deûs, Nestor Martin avèt inôgurè one bèle uzine o Bork . Albert Biron, èfant do Bork èt injéniyeûr a l’uzine, avèt scri one bèle tchanson ki cmincèt pas ces mots : Mes chérs pètits / Nestor l’a dit / Vos n’iréz pus / Côzu tot nus…
Durant trante cink ans, l’uzine a dnè d’ l’ovrâdje a du pus d’ çant ovris èt fêt vikè one bone çantin.ne du famîes. Mês i falèt aminè lu coke èt l’minète po trin èt po vicinal èt fére rupôrti les pîces uzinées po vicinal èt po trin. Kw’èst-ce ku les hèritîs da Nestor ont fêt ? Po suprimè tot l’trim’ tram’ des trins èt des vicinôs, ils ont stî fére des novèles uzines d’oû ç’ki gn’ avèt do tchèrbon ou dol minète : one a Hu èt one an France, (a Revin ?). Insi, pus pon du transpôrt. C’èstèt an mil noûf çant vint’ sèt’ èt c’est Georges Delaisse k’a stî tchèrdjè du mète fin a l’uzine.

One onte pètite uzine avèt cmincè al rouwe do Mont, pus sol l’Martchî, pus sol voye du Pwès avou les Koob. On î fèt des biciclètes, des machines a keûze sol marke Bury. Po les vèlos on dzèt : « Bury done des êles ». On cmincèt les vèlos o Bork èt on les achèvèt a Brussèl al chôssée d’Anvers. O Bork, on î fèt les cades avou les pèdaliérs, on les mètèt an coleûr o pistolèt, on î mètèt co les tubes dol sèle èt do guidon pus po évitè ki soyinche gordès dins l’ tram èt l’ trins an alant a Brussèl, on les ravontchèt dins des bandlètes an papî gris. Arivès a Brussèl, prumî ovrâdje c’èstèt du les dusvontchè avant du les achèvè. C’èstèt so onk du ces vèlo Bury la ku Karel Kaers, on coureûs bèlje, avèt gangnè lu championat do monde a Zurich an mil noûf çant trante cate an batant o sprint l’imbatâbe coureû italyin Guerra. Les hèritîs, po diminuwè lu pris du rvint, ont suprimè l’ uzine do Bork po raminè tot al chôssée d’Anvers a Brussèl. Come ça, is suprimint lu ravontchâdje du bandlètes ki s’fèt o Bork èt l’ dusvontchâdje ki s’fèt a Brussèl, ça fèt bramin des eûres du gangnées donc ostant d’eûres a nin payè. Ça suprimèt èt an’nulèt ossi les pris des voyâdjes. Kékes ovrîs, les mèyeus, ènn’ alint po l’samin.ne a Brussèl mês cand ils ont atint l’âdje dol rutrête on a pris des ovrîs a Brussèl po n’ pus payè les dèplaçmints des ovrîs borkins. An mil noûf çant carante noûf, c’èstèt lu deûzime duslocalizacion po Sint Hubêrt.

On ponk après dîj yût’ çant trante, lu vaye du Sint Yubêrt, avou ses bês batimints du l’anciène abî, avèt postulè po z’èsse lu chèf lieû dol province…C’est Arlon ki l’a amponrtè. Kékes anéyes pus tôrd on avèt co vèrzinè po sayè d’ avèr o Bork on èvèke, lu palês épiscopal èstèt ddja tot trovu. Èt co rouzè on côp les Borkins. An mil noûf çant trêze, po abritè èt rassèrè les èfants do Juge, les otoritès ont tchwèzi les bâtimints du l’anciène abî come Pènitanciér. Co pî ku l’uzine po amplwayè les djins, pus d’ çant omes èt fèmes î èstint amplwayès èt fint vikè du pus du çant famîes sins comptè les comèrçants ki vikint an fornichant tot ç’ki falèt o pènitanciér. Min.me lu çantrale élèctike î fornichèt l’ courant. An mil noûf çant cinkante chîj, on a trovu ku les métôdes du rudrèsmint mijes so pîds po Ministêre dol Justice èstint dèpassées. Lu ci ki vout touwè s’ tchin trouve k’il a l’gale èt l’ baston po l’avadjè. Ils ont amantchè on novê rêglumint èt c’est les ponves survêyants k’ont payè les pots cassès…sovint les pus zélès. On a suprimè lu pènitanciér èt on l’a ramplacè pas des novèles instalacions a Wauthier Braine. C’est l’ twazime duslocacion po l’ Bork.

Du ç’ tins la, on prindèt ça po ses oûs d’ Pôkes. Ödjoûrdu, dins les twas cas, les sindicats s’ôrint batu po avèr des condicions mèyeûtes po tos les cis ki do djoû o londmwin on stî fouru sol pavéye sins dèdomadjmints ni rclasmints.

Mondializacions èt duslocalizacions ont cmincè vla bin lontins èt ça n’est nin prète a èsse fini. Cand Alain Peyrefitte, minisse françês, a scrit an mil noûf çant sèptante sèt’ « Quand la Chine s’éveillera, le monde tremblera »(1), on a lî ça du d’ long. Çu k’il a scrit vla trante ans èst an trin d’arivè.

(1) Parole du Napolèon. 14.12.2007

May 1940

Li 10 di may, c' est l' djoû di nosse condjî del Pintcosse, et nos valijhes sont presses dispoy li 9 di l' après-cwatre-eures. Cwand les prumirès esplozions ont peté a cwatre eures å matén, dj' avans stî vite moussîs et presses a ndaler. Come tos les ôtes do grand dortwer, dji dischindans les montêyes e bea costume, beas solés et les valijhes al mwin.
So l' apas del såle di fizike, dji toume båbe a båbe avou l' Fré Ferdinandus.
- Où allez vos comme ça, Emile?
- Mais à la gare, cher Frère."
- Mon pauvre garçon, il n'y a plus de trains qui partent d'Arlon et les Allemands sont a Martelange. Ils ont bombardé la gare de Jemelle et d'autres; equipez vous pour une longue marche; avec vos valises, vos n'irez pas loin".
Dji rmonte å dortwer, dji fote mi valijhe sol lét, dji tchåsse mes gros solés d' pormoennåde, dj' apice deus tchmijhes, deus draps d' mwins, des tchåssetes ki dj' mete dins m' dobe malete di scolî. Avou ene cingue, dji fwai on saetch a poirter e bandouyire, et prinde mi calote d' unifôme.
Vos fåt dire ki dji vén a schipe di mi rfé d' èn acsidint. Dj' a yeu l' oxhea do bassén broyî, et l' sinfize pubyinne schoirsheye. Dji xhalteye co, et haetchî l' pate, et roter avou ene cane.
Tolminme, dji rdischind les montêyes cwate a cwate disk' a l' intrêye del tchapele, l' ouxh est sordrovowe, dj' intere:
"Seigneur, protégez-nous. Mais que votre volonté soit faite".
Dji ratrape les dierins d' ene rîlêye di dpus d' septante djonnes djins ki les Frés Stiene et Marie-Dona moennèt evoye pa l' Voye di Viveye po rdjonde li voye do Tchestea ki nos moennreut a Stockem, Heinsch...
Dedja les pus ptits et les pus flåwes abandnèt les valijhes tot l' long del voye. Les pus foirt ténront l' côp disk' a Heinsch. Simeyon a abandné totafwait, ki s' violon. Dji so tot seu avou l' malete sol dos. Après Heinsch, sol voye d' Habay, des djins rabrocèt ddja par ci:
- Les Allemands sont déjà a Habay, ils occupent la gare."
Dj' aprindrans après l' guere ki På Bultot di Teu a parvinou a passer padvant, et k' e passant a Sint-Houbert, il a stî dire a mes parints ki dji l' shuveu, et k' dj' alevé bénrade ariver.
Mes parints m' ont ratindou cwate moes.

*************

Dji prindans a gåtche so Fouches et dji rescontrans les prumîs sôdårds francès, ki sont ki minèt les rotes po les fé sôtler.
Sampont; Vance; Chantemelle.
Dji triviersans a grandès ascoxheyes li Bwès d' Årlon et l' terin militåre di Laglan po ratraper li voye ki va so Virton. Chatillon.
Ké cawêye di coreus evoye !
Dins l' binde, dji rtrovans des studiants di nost Institut avou des Frés. Li Fré Mareye-Dôna est mobilijhåve; ça fwait k' i nos va cwiter et c' est l' Fré Felicyin ki va vni avou nosse groupe.
A Tchekion, ci n' est k' ene djin ! Gn a la des tirayeus senegalès, ki riyèt disk' ås orayes, et promete di couper cabèche ås Almands avou leu longue hepiete.
Dji passans Sint-Ldjî [Saint-Léger] sins nos djoker, ki po boere on côp al fontinne. Dispoy Årlon disk' a Virton, dji n' årans nén magnî ni boevou ôte tchoi.
Les Frés ont ene sicole al voye des Fossés. Dj' î estans bén rçûs, mins come i n' ont pont d' internat, dj' alans soper å coledje Sint-Djôzef.
Des djins plin les voyes et plin l' coledje. A poenne li golêye foû del boke, dji brocans viè l' dortwer. Tot moussîs, dji nos stindans so les léts. Diviè meynute, des tirs di mitrayeuses et des caberdôxhaedjes nos fjhèt hopler foû do lét. Les sôdårds francès ricoulèt ddja a grand côp.
Avou les Frés, on decide di ridschinde et d' continouwer nosse tchimin après aveur beu ene djate di cafè et magnî ene pîce di pwin. E plinne noere nute, so les voyes todi pus tcherdjeyes, dj' arivans al Moûrtawe (Li Moite Aiwe, Lamorteau) avou bråmint des sôdårds francès ki s' riployèt ddja, et cori pus vite ki nozôtes.
Ké disdut po passer l' frontire !
Al Moûrtawe, i fwait noer come dins on for. Gn a la kékes dijhinnes di teritoriås francès, tot bleu moussîs, avou des vîs fiziks di 1914-1918, ki vlèt espaitchî les cintinnes, si nén des meyes, di rfudjîs di passer l' frontire. E il ont ddja bråmint egolé do pinard. I voeyèt des espions pattavå, et minme resserer nosse camaeråde På Simeyon po ene hapêye.
Il a fwait målåjhey del fé rlåtchî.
Èn pont fé d' loumire, nén ddja ene cigarete ni ene aloumete... ôtmint, ça gueuye di pattavå.
Li froxhe des rfudjîs passe houte des sôdårds et vo nos la e France. A cénk eures å matén, dji nos flaxhans so les trotwers di Monmdey et s' edoirmi e ratindant ki l' boledjî drouve.

A pî el France

Prumî bombardumint, mins ci n' est nén tot près.
Cwand les hoûlåds sounèt l' fén d' l' alerte, on atchtêye tchaeconk on pwin francès baguete. On n' è pleut aveur k' onk.
Pu cweri po moussî foû del veye.
Dins ene longue plate pateure, gn a ene avion d' tchesse almand k' aterixh. Li pilote mousse foû, grevisse on pô après l' moteur, rimonte dins posse di pilotaedje et revole come ene fleur... Nén ddja on fayé côp d' fizik ! Nouk des sôdårds ki sont la totavå n' a ddja sayî del dischinde.
A n' nén croere !!!!

**************************

Li solea est levé, i nos va taper sol coyene et sol hanete tote li djournêye.
On rote céncwante munutes; pu on s' ashî dijh munutes so les rotoes [bas-côtés].
Traversêye d' Ire-le-Sec... mot bén trové, ca c' est nosse gozî k' est setch, et les fontinnes sont råles.
A Louply, Fré Estiene et mwintes di nos soçons ont les pîs a clotchetes et minme a sonk. Gn a des djonnes ki flåwixhèt. Des sôdårds francès lezî trawèt les clotchetes, et lezî mete des pansmints. Adonpwis, i tcherdjèt les pus sakés so des camions.
Vo nos la côpé e deus. Fré Estiene avou les xhalés, Fré Felicyin avou les roteus.
Radjoû a Clery-Grand, kékes kilometes après Dun-so-Mouze.
Miråke ! Dji nos î rtrovans dins ene gregne dedja bôrêye.
Dins on cinte del Rodje-Croe, on nos sieve des grossès assîtêyes di poes. Rén d' si bon cwand on crive di fwin.
A poenne fini d' magnî, abeye al gregne, î fé s' trô dins l' four po s' i ploter et s' edoirmi come des binawreus, sins pus sondjî al guere.
A schipe edoirmous, dj' estans rewaeyîs pa des djindårs. Les 16 a 35 ans divèt rmonter so Dun-so-Mouze po prinde des trins k' elzès vont moenner dins les CRAB.
A Dun-so-Mouze, i gn a pont d' trin, et al gåre i n' savèt ddja çou k' ça vout dire.
Dj' end estans cwite po rvini a Grand Clery dins nosse gregne.
Diviè deus eures å matén, vo nos la co rewaeyîs: ene djonne feme acoûtche a l' loumire des wåmeles [bougies], des ôtes femes fjhèt on hayon di ttåtoû avou leus mousmints.
Vola, wai, on novea ptit Walon, ki vént do vni å monde dins ene gregne å mitan d' ene bele nute, come on djoû, vla bén lontins, èn ôte pitit efant, a Nazarete.

C' est a Clery Grand ki dj' alans passer l' djoû del Pintcosse et l' londi, dj' ô bén: les 12 et 13 di may.
Come ça dvreut esse li dicåce a Sint-Houbert, les troes Borkins vont boere on pastisse å cåbaret del plaece. Dji n' boerans k' ci-la, ca les deus Frés nos fjhèt li lçon. Asteure, dji nos contintrans d' ene pitite botaye di vén atchtêye a catchete. C' est waire po nos troes, mins ça fwait do bén dou çki ça passe.
Londi a cwatre eures et dmey å matén, des sôdårds vinèt co cweri les 16 a 35 ans. Rashonnés sol plaece, dji ratindans les ôres ki n' ont djamåy arivé. Adon, après deus eures passé dins l' froed d' l' åmatén, gn a on capitinne ki nos revoye.
Li mårdi 14 di may, les mobilijhåves decidèt avou l' Fré Estiene d' aler rdjonde, sins pus ratinde ni les ôres ni les sconte-ôres des Francès. Dj' estans ene cwarantinne.
Si l' årmêye bedje ni vént nén dé nozôtes, dj' irans dé leye !
Il est cwatre eures å matén. Dj' avans aprin pus tård k' on cwårt d' eure après nozôtes, les djonnes, ene dijhinne, n' ont pus volou ratinde nerén: i s' ont metou e voye avou l' Fré Felicyin. Il ont roté télmint rade k' å moumint di nosse ahote a Montfaucon, i nos ont racsûs.
Les deus bindes estént mo binåjhes, copurade la k' on nos invite dins on refectwere militåre, bôré a hope, po dinner.
Bén guedés, vo nos la revoye so les tchmins todi ebertakés di tot çki rote et di tot çki rôle.
Après des kilometes e plin solea, dins ene bele waide metowe dizeu Varendes-en-Argonne, dji no leyans toumer et s' edoirmi ttossu rade.
C' est les zûnmints d' ene escadreye di bombardîs ki nos vont rewaeyî. I sont foirt hôt. I rglatixhèt å solea. I passèt houte ... mins tot d' on côp, gn a on shofelmint ki dj' conoxhans bén. Nosse sonk ni fwait k' on toû. Il ont låtchî des bombes ki toumèt so Varendes.
Po trevåtchî l' veye ene eure après, dji roténs dins les rwenes. Ké botchreye ! I vizént l' pont, i l' ont raté mins i n' ont nén raté li scole a costé do pont k' esteut bôrêye di rfudjîs. Les moirts et les coixhî estént ddja evacuwés. Deus tchvås, coutchîs conte les glindisses del sicole, estént la ki crevént. I tanflént et s' kibate. Et nolu po lzî dner l' côp d' gråce.

Dji rotans asteure dins ene schavêye, avou des grands bwès des deus costés. Tot d' on côp, dj' oyans ene avion. Zoup ! Tertos a plat vinte dins les fossés.
C' esteut ene avion francesse, li seule ki dj' avans veyou so tot nosse voyaedje.
Dji nos avans rlevé e riyant. On pôk divant, dj' avéns passé addé ene cinse abandnêye. Les valets d' cinsîs k' estént dins nosse binde avént modou les vatches ki boerlént, et les pus maléns avént stî vudî les niyåds plin d' oûs. Simeyon, k' aveut co deus ou troes oûs dins les potches, s' a rlevé avou on fameuse omlete plakêye sol botroûle.
Dji rotans disk' a l' noere nute, et avni a l' eglijhe di La Harazée. Did la, nos voeyans å lon Sainte-Menehould e feu.
Dins l' eglijhe, nén moyén d' trover ene bedrêye po fé chlop.
Ça fwait k' nos continouwans, todi dins l' trô do cou del nute - såf respet - disk' a Vienne-Tchestea [Vienne-le-Câteau] la k' on toume so on grand tcheri d' ene cinse k' a stî elaideye. Les bounès plaeces sont ddja hapêyes. Avou ene schåle, dji nos hertchans sol cina, rimpli d' four mins grand å lådje ås cwate vints. Nos nos placans onk siconte di l' ôte, come des påpåds dins l' vinte del mame, po nos rastchåfer, et doirmans ene eure ou deus.
Tot timpe å matén, tot roeds et tot edjalés d' froed, dj' alans boere do bén tchôd cafè avou des pwins francès (baguetes) addé l' comité po rçure et les sôdårds. On pô a l' ecart, deus ptitès viyès femes nos fjhèt sene, eles nos ofrèt leus cours avou pompe et des bassins po nos rnetyî. Torse nou et bén d' pîs, c' est l' prumî côp dispoy Årlon ki dji nos lavans å mitan des fleurs bén al coete. Nos deus ptitès femes sont come li "moxhe do coche", ele vont d' onk a l' ôte po dmander çou ki dji vlans. Dji passans tote li djounêye dins ene sale do viyaedje a sogner nos bobos et a nos rapoizer. Etur Vienne le Château et Åve, dj' alans roter tote li nute : pus ou moens trinte kilometes (?). Dji passans l' djournêye dins ene sale do viyaedje et dji doirmans sol cene. Po l' etape, minme djeu d' nute po l' djudi 16 di may (25 kilometes) disk' a Châlons sur Marne.
Dj' avans decidé di n' pus roter do djoû, mins fok par nute.
Po intrer dins ç' veye la, å mitan d' on copixhî d' rifudjîs, dj' avans co a fé avou des teritoriås al tchesse del cénkinme colone. A on moumint dné, gn a onk di ces sôdårds la, crevé sô, k' apice nosse Fré Felicyin på cô et l' voleur l' emoenner å posse di contrôle. Dji nel leyans nén fé. Al fén, gn a on djonne lieutnant k' adåre so l' apougnåde, ki voet bén cwè, et rlåtchî nosse Fré.
Ci-cial a pierdou s' rabat on pôk divant. C' est on grand foirt ome, k' a ene cogne ki fwait sogne ås sôdårds.
Raplans ki les Frés sont e sotane.
On croereut bén ki ç' vî sôdård la ni sait nén k' gn a yeu 1789 !
Ces vîs sôdårds la avént ddja sacwants veres di vén dins l' gargolete. Il estént grossîs come des poirtchîs et hagnants come des tchéns d' barakîs. Dins l' fond d' leu poupå, on sinteut bén k' i voeyént evî les curés, on sintimint ki dji n' conoxhans pus el Beldjike. I vs årént fotou ene bale al camizole come po rire.
Vo nos la cwand minme houte ! Gn a ddja pont d' må.
Après ene hapêye, vo nos la dins l' Hôtel-Dieu, atåvlés divant ene fameuse assîtêye di ptits poes et on boket d' tchår. E mitan d' l' eurêye, les hoûlåds anoncèt l' alerte mins c' est ddja trop tård. Des bombes inçandires toumèt so l' dilé d' l' Hôtel-Dieu, djusse divant nozôtes, la k' i gn a les såles d' acoûtchmint.
Ké ramxhireye, mon parant ! Les bombes ki baerdôxhèt, les bokets d' plafond ki vnèt djus, li spesse foumire k' amousse pås vites drovowes på petaedje des bombes, les hoûlåds ki gueuyèt; les efants et les femes ki boerlèt, et nozôtes ki broke evoye al schape-kî-pout avou l' golêye el boke.
On potche so les tåves, on ascoxhe les bancs, po wangnî après les ouxhs. On sôte minme pås vites. C' est la ki nos deus soçons Martin Klontz et På Simeyon ont monté troes côps a l' astaedje ki broûléve, avou des Sours et des infirmires, po schaper des novea-nés et des femes acoûtchêyes et des k' alént acoûtchî.
Adon, dji nos avans metou sol costé po leyî l' plaece ås pompîs.
Li Fré Estiene a stî a l' Evetchî avou deus grands. I rarive avou ene pitite tcherete tcherdjêye di pwins, di boure di pot [confiture] et di poude po fé del coco avou d' l' aiwe.
Cwand dj' estans po moussî foû del veye, gn a ene novele alerte ki nos oblidje a rintrer dins les cåves di tchampagne Mercier, schavêyes dins l' rotche. Des wårdeus nos disfindèt d' aprotchî des botayes.
C' est les Almands k' els åront e leu bodene sacwants samwinnes pus tård…

(Mwaisse modêye, avou l' accint do Bork)

(Même texte, en notant l' accent de Saint-Hubert)

Lu 10 mêy èst l’djoû du nosse condjî dol’Pèncosse èt nos valizes sont prètes dupouy lu 9 du l’après katr’eures. Cand lès prumires ècsplosions ont pètè a catr’eures do matin , dj’on stî vite moussès èt prètes a pôrti. Come tos lès ontes do grand dortwâr, dju duchindant lès montéyes an bê costume, bê solès èt lès valizes al mwin. O paliér dol sale du fizike, dju tume bôbe a bôbe avou l’Frére Ferdinandus. “ Où allez-vous comme ça, Emile?” – “Mais à la gare, cher Frère.” – “Mon pauvre garçon, il n’y a plus de trains qui partent d’Arlon et les Allemands sont à Martelange. Ils ont bombardé la gare de Jemelle et d’autres, équipez-vous pour une longue marche, avec vos valises, vous n’irez pas loin”. Dju rmonte o dortwâr, dju fou m’valize sol lit, dju tchoze mès gros solès d’porminade, dj’apisse deûs tchmiches, deûs èswimins, dès tchossètes ku dj’mè dins mu malète dobe du scolî, avou one cingue dju fêt on satch a pwartèr an bandouyère, mu calote d’uniforme. Dju rutchin lès montéyes kate a kate (portant dju rlève d’on’ acsidant, l’ochê do bassin broyè èt l’symphyse pubiène chwarchéye, dju tire lu pate èt dju rote avou one cane) jusk’a l’intréye dol tchapèle, l’uch èst sordrovue, dj’inture: “Seigneur, protégez-nous mais que votre volonté soit faite”. Dju ratrape lès dèrins d’one colone d’au mwin sèptante djon.nes djins ku lès Fréres Etienne èt Marie-Donat minant pa l’Voye du Viville po rdjonde lu voye do Tchèstê ki nos min’rèt a Stockem, Heinsch…Dèdja lès pus ptits èt lès pus fèbes abandonant lès valizes tot l’long dol voye. Lès pus fwar tinrant l’coup juska Heinsch. Siméon a abandonè tot sôf su violon. Dju si tot seû avou l’malète sol dos. Après Heinsch, sol voye d’Habay, dès djins rabrocant d’dja par ci: “Lès Allemands sont déjà à Habay, ils occupent la gare.” Dj’aprindrans après l’guère ku Paul Bultot du Theux a parvènu a passèr avant èt c’an passant a Sint-Yubèrt il a stî dire a mès parints ku dju l’sîjè, ku dj’alè binton arivèr: mès parints m’ont ratindu kate mwès.
Dju prindans a gôtche so Fouches èt dju rascontrans lès prumî sondârds francès ki sont an train du minèr les routes po lès fére sontèr. Sampont. Vance. Chantemelle. Dju travèrsans a grandes ascôchéyes lu Bwès d’Arlon èt l’tèrin militêre du Laglan po ratrapèr lu route ki va so Virton. Châtillon. Ké cortèje du coureûs voy! Dins l’bande dju rtrovans dès ètudjants du nos’ Institut avou dès Fréres. Lu Frére Marie-Donat èst mobilizâbe, i nos kite èt c’èst l’Frére Félicyin ki va vnu avou nos’ groupe. A Châtillon, rimpli d’djins, lès tirayeûrs sénégalês, riyant jusk’ôs orayes, su promètant bin du “couper cabèche” ôs Almands avou leû longue machète. Dju travèrsans Saint Léger sins nos arètèr, sauf po bware on côp al fontin.ne. Dupouy Arlon jusk’a Virton dju n’aurans nin mougnèr ni beû onte tchonse. Lès Fréres ont one sucole al voy dès Fossès, dj’î sont bin rcî mês come is n’ont pon d’internat, dju vont sopèr o collèje Saint Jozèf. Dès djins plin lès voyes èt plin l’collèje. A pon.ne lu goléye foû dol boutche dju fonçans o dortwar. Tot moussè, dju nos stindans so lès lits. Duvè méynute, dès tirs du mitrayeuses èt dès dèflagracions nos fant oplèr fou do lit. Lès sondârds francès ruculant a grand côp. Avou lès Fréres, on dècide du rutchinde èt d’continuèr nos’ tchumin après avèr beû one jate du cafè èt mougnèr one pîce du pwin. An plin.ne nwâre nut’, so lès routes du pus a pus tchèrdjéyes, dj’arivans a Lamorteau avou bramin dès sondârds francès ki s’ruployant d’dja courant pus vite ku nos. Ké mic mac po passèr l’frontiére.
A Lamorteau, i fêt nwâr come dins on for èt kékes dijin.nes du tèritoryôs francès an bleu orizon, avou dès vî fuzik du 14-18 vlant aspètchèr lès çantin.nes, si nin dès mile, du réfujyès du passèr l’frontiére, is l’ont d’dja fwarsè sol pinard. Is vèyant dès èspions partout èt is prindant min.me nosse camarade Paul Siméon…ku dj’on mile ruzes a libèrèr. Nu pon fére du lumiére, nin min.me one cigarète ni one alumète…sinon ça gueuye du partout. Lu flot dès rèfujyès dèborde lès sondards èt vos no vla an France. A cink eûres do matin, dju nos flachant so lès trotwars du Monmédy èt dju nos i adwarmant an ratindant ku l’boulanjér drovure. Prumî bombardumint mês çu n’èst nin tot près, cand lès sirin.nes sonnant lu fin d’l’alèrte, on atchète chacun one baguète (on n’pou nin énn’ avèr deûs) dju kèrant lu sôrtie dol ville. Dins one longue plate pature, one avion du tchèsse almand atèrit, lu pilote mousse foû, tchipote o moteûr, rumonte dins posse du pilotatche èt duscole come one fleûr…nin on seûl côp d’fuzik, dès sondârds ki sont pat’t-avô n’ont nin sayèt dol duch.chinde. Incwayâbe!
Lu solê èst lèvè, i va nos tapèr sol dos èt so l’ènate tote lu djournéye. On rote cincante minutes pus on s’assit dije minutes so lès roteûs. Travèrsée d’Iré-le-Sec…mot bin trovu, c’èst nosse gozî k’èst “sec”, lès fontin.nes sont rares. A Louply, Frére Etienne èt mwintes du nos soçons ont lès pîds a clotchates èt min.me a sang. Gn’a dès djon.nes ki flôwichant. Dès sondards francès lès z’î pèrçant lès clotchates, lès z’i mètant dès pansemints pus tchèrdjant lès pus môs foutus so dès camions. Nos vla compè a deûs. Frére Etienne avou lès chalès , Frére Félicyin avou lès roteûs. Randéz vous a Cléry Grand, kékes kilomètes après Dun-sur-Meuse. Mirâke! Dju nos i rtrovant dins one grègne dèdja fwar ocupéye. Dins on çante dol cwa rodje, on nos siève dès grosses assiètéyes du pwès. Rin d’si bon cand on crève du fwin. A pon.ne fini d’mougnèr, vite al grègne, i fére su tron dins l’foûr po s’i plotèr èt s’adwarmu come dès byineûreûs sins pus sondjèr al guère. Apon.ne adwarmus, dju sont rawayès pa dès jandarmes, lès 16 a 35 ans duvant rmontèr so Dun-sur-Meuse po prinde dès trins ki vont lès minèr dins lès CRAB (Centre de Recrutement de l’Armée Belge). A Dun-sur-Meuse, i gn’a pon d’trin èt al gare i n‘savant nin ç’ku ça vous dire, dj’è son kite po rvènu a Grand-Cléry dins nosse grègne. Duvè deûs eures do matin, nos vla co rawayès: one djon.ne fème acoutche a l’lumiére dès boujies , dès ontes fèmes fant on paravant tot au toû avou leûs moussemints.Tot brèyant, lu novê ptit Belje vint du vnu ô monde dins one grègne o mitan d’one bèle nute come on djoû, vla bin longtimps, on’onte pètit èfant, a Nazareth.
C’èst a Cléry-Grand ku dju vons passèr lu djoû dol Pèn’cosse èt l’ londi, lès 12 èt 13 du mêy. Come ça duvrèt èsse lu dicôsse a Sint-Yubèrt, lès twas Borkins vont bware on pastis o bistro d’an face. Dju n’bwarans ku ç’ti la, lès deûs Fréres nos fant lu l’çon èt dju nos contintrans d’one pètite botèye du vin achtée a catchète, c’èst wèr po nos twas, mês ça fêt do bin d’ou ç’ku ça passe.
Londi a katr’eures èt dmi do matin, dès sondards vènant co kèr lès 16 a 35 ans. Rassamblès sol place, dj’atindans lès ordes ki n’ont jamês arivès: on capitin.ne nos ravoy après deûs eûres dins l’fwa do matin.
Lu môrdi 14 du mêy, lès mobilizâbes dècidant avou l’Frére Etienne d’alèr al rasconte du l’armée bèlje sins pus ratinde ni lès ordes ni lès contrordes dès Francès, dju son one carantin.ne: si èle nu vint nin a nos, dj’irans a lèye ! Il èst katr’eûres do matin. Dj’on apris pus tôrd k’on kart d’eure après nos, lès djon.nes, one dijin.ne, n’ont pus volu ratinde non pus: i s’ont mètu an route avou l’Frére Félicyin. Is l’ont rotè télmint vite k’o momint du nos’ arèt repos a Montfaucon, i nos ont ratrapè. Lès deûs groupes sont vrêmint fwart binôches surtout k’on nos invite dins on réfèctware militêre, bonrè a hope, po dinèr. Bin guèdès, nos vla rvoy so lès routes todis ancombréyes du tot ç’ki rote èt du tot ç’ki roule. Après dès kilomètes an plin solê, dins one bèle pature ki domine Varennes-en Argonne, dju no lèyans tumèr èt dju nos adwarmans tot si vite. Lès ronron’mints d’one escadrie du bombardiérs nos rawayant, i sont fwart yon, i rglatichant o solê, i passant ut’…mês tot d’on côp, on chofulmint ku dju conuchans bin nos glace lès sangs: i l’ont lachè dès bombes ki tumant so Varennes. Po travèrsèr l’vaye one eûre après, dju rotins dins lès rwines. Ké botchrie! I vizint l’pont, i l’ont ratè mês i n’ont nin ratè lu scole a costè do pont k’èstèt bonrée du réfujyès. Lès mwarts èt lès blèssès èstint d’dja èvacu.ès. Deûs tchvaus, coutchès conte lès griyes dol sucole èstint an trin d’moru, i tanflint èt i s’cubatint, nolu po l’z’i donèr lu côp d’grâce. So l’voy ankêssée, bordée du spèsse sutindues bwèzée, d’atindans one avion, hop! tortos a plat vinte dins lès fossès, c’èstèt on’ avion francès, lu seûl ku dj’on vu so tot nos’ voyâdje. Dju nos z’on rlèvè an ryant. On ponk’avant, dj’avins passè addé one cinse abandonée. Lès valèts d’cinsis k’èstint dins nos’ groupe avint modu lès vatches ki beûrlint èt lès pus malins avint stî vudèr lès niyôs plin d’oû. Siméon k’avèt co deûs ou twas oû dins lès potches s’a rlèvè avou on fameûse om’lète plakée sol botroûle. Dju rotans jusk’a l’nwâre nut’, jusk’a l’èglije du La Harazée, mês nin moyin du trovu dol place, dju continuans, todis dins l’nwâr jusk’a Vienne-le-Château èt on grand hangar d’one cinse a l’abandon. Lès bones places sont d’dja prijes. Du La Harazée, dj’on vu ô long Sainte-Menehould a feu. Dj’on pris l’dècizion du n’pus rotèr do djoû, dj’optans po lès marches du nut’. Avou one chôle, dju nos îrtchans sol bèton rimpli d’four mês drovu ôs catre vants. Plakès onke conte l’onte dins l’pozicion do fétus’ po nos rastchofèr, dju dwarmans one eûre ou deûs. Fwart du bone eûre, tot rwa èt tot adjalés, dju vont bware do bin tchond cafè avou dès pwin-baguètes addé lu comitè po rcire èt lès sondârds. On pon a l’ècart, deûs ptites vî fèmes nos fant signe, èles nos ofrant leûs cour avou pompe èt dès bassins po nos rnètchèr. Torse nu èt bin d’pîds, c’èst l’prumî côp dupouy Arlon ku dju nos lavant o mitan dès fleûrs bin al kwète. Nos deûs ptites fèmes sont come lu “mouche do coche”, èles vont d’onke a l’onte po dmandèr çu ku dju vlans. Dju passans tote lu djounéye dins one sale do vyâdje a sognèr nos bobos èt a nos rapwazèr. Intur Vienne-le-Château èt Auve, dju vons rotèr tote lu nut’: pus ou mwin trante kilomètes (?). Dju passans l’djournéye dins one sale do vyâdje èt dju dwarmans sol cène. Po l’ètape, min.me djeû d’nut’ po l’djudi 16 mêy (25 kilomètes) jusk’a Châlons-sur-Marne.
Po intrèr dins ç’vaye la, o mitan d’on capuchî d’réfujyès, dj’on co afin.re avou dès tèritoryôs al tchèsse dol cinkime colone, onke du cès sondards, monrzîve, apisse nosse Frére Félicyin po con èt vout l’aminèr o posse du contrôle, dju nos opozans èt c’èst on djon.ne lieûtnant ki libère nos’ Frére k’a pièrdu s’rabat on ponk avant èt k’a one silouwète ki n’inspire pus confiance ôs sondârd dol patrouye. Raplans ku lès Fréres sont an soutane. Manifèstumint, çu vî sondârd la dol Républike n’a nin co dijèrè 1789. Cès vî sondârds la k’avint d’dja fwarsè sol pinard èstint grossî come dès pwartchî èt mèchants come dès tingnes, avou dins lès ouy on rflèt d’anticléricalisme d’on’ onte âdje èt ku dju n’conuchans pus an Bèljike. I v’z’orins foutu one bale al camizole come po rire. Dju passans. Nos vla dins l’Hôtel Dieu, atablès duvant one fameûse assiètéye du ptits pwès èt on bokèt d’tchôr. O mitan do rpas, lès sirin.nes anonçant l’alèrte mês c’èst d’dja trop tôrd, dès bombes inçandières tumant so l’êle du l’Hôtel Dieu, jusse paralèle al nosse, lu cile k’abrite lu matèrnitè. Lu bru dès ècsplozions, lès bokèts d’plafond ki tumant, lu spèsse fumîre k’inture po vites drovues pa l’dèflagracion, l’urlumint dès sirin.nes dèclanchant dès cris d’èfants , dès cris d’fèmes èt dès panikes du “sauve qui peut” po torto avou l’goléye al boutche. On sonte so lès tabes, on ascôche lès bancs, po gangnèr lès uch…on sonte min.me pô vites. C’èst la ku nos deûs soçons Martin Klontz èt Paul Siméon ont montè twas côps a l’ètaje a feu avou dès Seûrs èt dès infirmiéres po sauvèr dès pâpâs novèlmint nés, dès novèles acoutchées èt dès fèmes k’alint acoutchèr. Dju dègajans po fére place ôs pompiérs. Lu Frére Etienne a stî a l’èvèché avou deûs grands. I r’arive avou one pètite tchèrète tchèrdjéye du pwins, du confiture èt du poude po fére dol coco avou d’l’êwe. Dju gangnans l’sonrtie dol l’vaye, novèle alèrte ki nos oblidje a intrèr dins lès côves do champagne Mercier creûzées dins l’rochér. Dès gardes nos dusfindant d’aprotchèr dès boteyes…c’èst lès Almands ki lès prindrant kékes samin.nes pus tôrd.

E vacances e l' Ardèche e moes d' djulete 1940

Dins les clawes di l' årmistice, les Almands avént decidé d' ocuper on lådje boket tot l' long del Mer disk' ås Pirenêyes. Bordeaux esteut ddins. Li govienmint francès, refudjî ladrî, doet co baguer. Li 29 di djun, Petin li moenne a Clermont-Ferrand. Pu, li 1î d' djulete, a Vichy. Li 2 d' djulete, l' URSS ocupe ene pårteye del Roumaneye. Raplans k' a ç' moumint la, Hitler et Staline sont loyîs pa on pake "d' amisté et d' nén-atacaedje".

Nosse pôve France a ddja yeu on côp d' coutea dins l' dos des Itålyins. Asteure k' ele est a djno, les Inglès l' vont atchever. Li 3 djulete, l' aviyåcion inglesse atake les bateas francès enancrés addé Oran, a Mers-El-Kebir (li Grand Poirt). Les bombardîs et les tchesseus vont-st evoyî totafwait å fond d' l' aiwe. Li 6 djulete, i rvinront co po-z atchever. Churchill dins l' prumî volume di ses "Memoires", raconte ås pådjes 449 a 458.

"Li 17 di djun, dit-st i, il a dmandé a Petin et a Weygand di ramoenner tote li flote francesse dins les pôrts inglès. On lyi dit ki l' flote ni serè djamåy dinêye ås Almands. Pus tård, Churchill fwait co l' minme dimande a l' amirå Darlan ki lyi respond :
"Il ne peut être question de la céder aux Allemands, ce serait contraire a nos traditions navales et à notre honneur!"
Mins, l' årtike 8 del armistice dit ki :

"La flotte française sera rassemblée dans des ports a désigner pour y être démobilisée et désarmée sous contrôle allemand et italien".

Après l' 25 di djun, Churchill a peu. Les troes flotes almande, itålyinne et francesse sont-st on vraiy dandjî po l' Inglutere. I prind l' decizion di distrure les navires francès. Vla mot po mot çou k' i scrît al pådje 457:

"Dans tous les pays di monde, le fait d' avoir éliminé presque d'un seul coup le facteur important que représentait la flotte française causa une impression profonde. Voilà que cette Angleterre que tant do gens estimaient deja vaincue et finie, que les étrangers imaginaient toute tremblante, au bord de la capitulation, devant la formidable puissance dressée devant elle, frappait brutalement ses plus chers amis de la veille et s'assurait momentanément la maîtrise incontestée des mers. C'était montrer a l' évidence que le Cabinet de Guerre britannique ne redoutait rien et ne reculerait devant rien. Et c'était exact!"

Dji dirans co ki Churchill a cwand minme touwé 1.297 marins francès sins somacion, come on traite. Avou bråmint moens di moirts, i gn a des ci k' ont stî codånés come moudreu d' guere.
Tote li fén do moes d' djulete, les djins did voci disbåtchîs pår. Pus on sorire so les lepes, to direus on peupe di zombiyes. Ça doet esse li minme dins tote li France. Li 5 di djulete, Petin côpe les "rlåcions diplomatikes" avou l' Inglutere.

Après tant d' mizeres, i fåt trover on coupåbe. I fåt trover l' ci ki va gober l' såce. C' est dins les gazetes ki dj' alans shure ça : li bataye etur les noveas et les ancyins do govienmint. Li 9 di djulete, 398 deputés disconte di 3 et 230 senateurs disconte di onk decidèt k' i vont mete so pî ene novele constitucion.

L' assimblêye nåcionåle dene å djenerå Petin li tite di "Chef de l' Etat Français" avou TOS les droets, såf li ci di dclårer l' guere. Li no "republike" n' est pus prononcî. On fwait saveur å prezidint Lebrun k' i n' est pus rén di to. Les ancyins, Paul Reynaud, Edouard Daladier, Georges Mandel, li djenerå Maurice Gamelin, Léon Blum...sont metou el cadje a Chazeron et seront djudjîs. De Gaulle est codåné a moirt. Ça vou dire ki nosse vî marixhå Petin va prinde e mwin li destinêye do payis.

Pa l' TSF, dins les gazetes, avou des afitches, avou des proclamacions afiychêyes dins les mwaireyes di tos les viyaedjes, i va sayî di rinde ås Francès li foice di rmonter po s' ridresser.

Minme François Mitterand après si stepaedje-evoye d' on camp d' prijnî, va travayî avou lu a Vichy. Bråmint des djins el vont schoûter et shure. L' istoryin Henri Amouroux, sicrît li deuzinme di ses volumes "La grande Histoire des Français sous l' occupation" e lyi metant come tite: "Quarante Millions do Petinistes".

Cwand Petin arive dins ene veye, i gn a des meyes di djins ki l' vinèt tchaker.

Après l' guere, Paul Reynaud k' a stî rlåtchî, a vnou å tribunå dire: "Il faut faire un grand effort d' imagination pour réaliser aujourd' hui ce qu'était le Maréchal en mai 1940. Nous avons tous travaillé a le DIVINISER. Ménageur du sang de ses soldats, il montait pendant que les autres généraux descendaient dans la tombe. Sa figure marmorée en fut le facteur décisif do sa renommée." (Rilére les gazetes francesses do moes d' djulete et awousse 1945 ki racontèt l' procès do marixhå Petin. Les bokets ki dj' a scrît voci, dji ls a prins dins l' Figaro.)

On pô rapåjhtés, dji fjhans les deus fiesses nacionales: li 14 et l' 21 di djulete. Estô des bals, des flonflons, des defilés, dj' årans ene messe di Recwiyem shuvou d' ene måtche linne (marche lente) disk' å monumint ås moirts. Pont d' discours mins ene priyire, des fleurs et ene munute sins dire on mot, sondjans ki béntoit so ç' monumint la, les noms di nouv touwés di 1940 iront addé les cis di 14-18.

Deus noveas måleurs toumèt co. Nos soçons do Redîmé Payis et les cis do Lussimbork aprindèt k' i sont anecsés å Grand Reich avou les Alzacyins et les Lorins. Hitler oblidje li France a lyi payî 400 miyons d' francs par djoû d' ocupåcion.

Lu flame olimpike. (prumîre pârtîe)

Trichrîes, bagares,disputes, boyicote dupouy lu cminçmint.

An dîj ût çant nonante chîj, lu rwè Georges prumî du Grêce a proclamè les prumîs djeûs olimpikes drovus pus i s’a toûrnè do costè do Baron du Coubertin po lî dîre ku c’èstèt grâce a lî ku ç’grande manifèstacion la cumincèt. Mês lu baron èstèt ddja dins ses ptits solès sondjant ôs frês èt surtout an vèyant des kèreûs d’mizére ki sayint ddja a lî mète des bastons dins les roues. Su prumî tracas avèt stî vite choflè pasku on miliardêre grèc, Averoff, lî avèt dnè on miliyon du francs-ôr. Mês l’èsprit nacionalice èstèt ddja dins les tribunes an marbe blanc do stade panaténaïke complètmint rénovè, i datèt do catrime sièke avant Jézus-Xrist.
Pa twas côps lu drapô des Almands avèt stî lèvè po saluwè lu trio des jim.masses, tot l’peûpe grèk s’avèt lèvè an gueuyant « adiba, adiba » (injustice). C’èstèt an dîj ût’ çant nonante chîj èt on pout ddja lîre dins les gazètes : « …loin d’étouffer les passions nationales, tout ce faux cosmopolitisme du stade les exaspère. » Èt portant onk des tèkces duzèt ku les djeûs alint rassèrè les antantes intur les nacions èt créè lu pês étèrnèle. Panse-tu, Lulu !.
Lu prumî maraton des djeûs alèt raminè l’boneûr amon les grèks. I fèt one tchaleûr du canicule èt on promètèt bramin des côps d’ solê. Lu Francês Lermusiaux ki minèt long pa dvant tume dins les pomes, l’Ôstraliyin Flak ki prind l’tièsse tume asblôwi après avèr beû on grand vinre du vin, èt c’èst lu bièrdjî grèk Spiridon ki gangne lu course ôs carante deûs kilomètes. Il èst pwartè so les spales jusk’ôs pîds do rwè duvant tot lu stade drèssè, gueûlant èt tchacant des mwins.

An mil noûv çant, ôs djeûs du Paris, c’èst l’match du rugby ki fout lu tchin dins les pouyes. I fôt bramin d’policiyés po mintni l’orde. Des bandes du suportêrs o bwârd du l’istérîe vlant atakè les djouweûs almands mês, par chance, les Francès gangnant pa 25/16 çu ki calme les dusmontès.
Lu 14 du jwiyèt, fièsse nacionale on suprime les sôts an longueûr. Lu champion do monde, Prinstein, on’ Amèrikin nu vout nin sôtè lu londmwin, dimagne , djoû do Sègneûr. On’ onte Amèrikin sôte 7m18 èt dvint champion olimpike. Aradjè lu prumî bokse lu vinkeûr, les partizants du chake costè s’apougnant ossi èt l’bagare duvint gènèrale. La ossi, c’èst l’maraton ki va rapôchtè les Francès : Michel Théato, djârdinî o Racing du Paris va gangnè…mês l’Amèrikin, Dick Grant k’èstèt al tièsse avèt stî stôrè volontêrmint pa on filou an biciclète.

An mil noûv çant cat’, c’èst a Sint Louwis, ôs USA, pièrdu ô djâle long. Seûlmint dîj nacions èt swasante cate atlêtes avou les Amèrikins. Vla co l’maraton mètu a totes les sôces. L’Amèrikin Fred Lorz, dins l’ploton , a des crampes, i s’arète, mousse dins one ôto ki l’mine long pa dvant. Ça lî va mî, i
s’rumèt a couru èt inture o stade avant tortos. Cand l’vrê gangneûs arive on discalifie Lorz èt on ponk après on discalifie ossi lu prumî k’arive pasku on lî a fêt deûs côps des picures d’on miligrame du sulfate du stricnine èt fêt bwâre do cognac. On n’su catchèt nin po s’dopè. Les djeûs d’ Sint Louwis ruson.nit dpus a one fwâre k’a on rassamblumint sportif. Lu prèsse européyène n’è côzèt nin. Portant lu baron de Coubertin, ki n’a nin stî ôs djeûs, sucrit : « Quant à cette mascarade outrageante, elle se dépouyera tout naturellement de ses oripeaux, lorsque ces Noirs, ces Rouges, ces Jaunes apprendront à courir, à sauter, à lancer et laisseront les Blancs derrière eux » ( Paroles prophétiques)

An mil noûv çant yût’ a Londes. Les idiocies arivant dins l’ciclisme. Lu Francès Schillès a gangnè lu course du vitèsse mês come les deûs omes ont fêt trop lontins do surplace, les oficièls royant d’on côp d’ crèyon su pèrformance do palmarès des djeûs. Motif, il a mètu trop lontins po fére les deûs toures du pisse.
Dins lu finale do 400 mètes, twas Amérikins èt on’ Anglès, sol pisse is s’ foutant des côps d’ keudes, is s’tirant po mayot èt pa l’culote èt is s’ barant l’passâdje. Onke des Amèrikins, Carpenter, gangne mês les oficièls fant rucmincè l’ course. Les twas Amèrikins nu vlant nin couru, l’Anglès fêt les 400 mètes tot seû èt gangne lu médaye d’ôr.

An mil noûv çant dosse a Stokolm, on a les prumîs djeûs prompes èt fwârt bin organizès. Les cink continants sont la, vint’ yût’ èkipes, deûs mile cink çant carante atlêtes dont cinkante sèt’ fèmes. Claire Gutt èst lu prumîre fème bèlje a z’avèr couru ôs djeûs.
Dins lu cink mile mètes, lu Francès Bouin èt lu Finlandès Kolchmainen vont minè on trin d’anfyinr. Les Anglès, les Amèrikins èt tos les z’ontes sont lachès. Fwârt ô fwâr les deûs omes nu s’rindant nin onk po l’onte èt après on sprint tèribe minè po Francès c’èst lu Finlandès ki gangne d’one pwètine. Lu rucôrd du 14’36’’3/5 nu srèt batu k’an mil noûv çant vint’ deûs pa Nurmi, dîj ans pus tôrd. Lu vedète du ces djeûs la srèt l’Amèrikin Indjin Thorpe ki domine lu pintatlon èt décatlon : les z’ontes nu lî arivant nin al tchuviye. Mês on a stî rkèri k’il avèt djouwè o baskèt po des sous èt du ç’ fèt’ la i n’èstèt pus amateûr mês profèsionèl. Il a stî duscalifiyè èt a du rinde ses médayes.

An mil noûv çant vint’ a Anvers avou lu rwè Albert so place. De Coubertin a mètu tot an sêne. I gn’a co pon d’ flame mês on pronounce lu sermant olimpike po l’prumî côp èt l’drapô olimpike va dmorè o mat tote lu durée dol compéticion. C’èst on Bèlje ki va pronounce lu sèrment: Victor Boin . «Nous jurons que nous nous présentons aux Jeux Olympiques en concurrents loyaux, respectueux des règlements qui les régissent et désireux d’y participer dans un esprit chevaleresque pour l’honneur de nos pays et la gloire du sport »
Les Belges vont s’î distinguè. Twas médayes d’ôr o tir à l’arbalète, médaye d’ôr an yating èt médaye d’ôr an fotbal après on match a catoûnes conte lu Tchécoslovakie. Les Beljes minant du 2 a 0 cand Coppée, on djouweûs bèlje est blèssè èt dèt sôrti, l’arbite fout lu tcwacheûs tchèke a l’uch’. Nin contins, les Tchèkes kitant l’ tèrin èt les spèctateûrs intrant dins l’tèrin po pwartè nos djouweûs an trionfe.

An mil noûv çant vint’ cate a Paris, lu scandale arive dins lu match du rugbi intur les Amèrikins èt les Francès ki sont batu pa 17 a 3. Nin contins les spèctateûrs intrant sol tèrin, cuchèrant les drapôs amèrikins èt atacant les djouweûs, djouweûs ki rintrant ôs vèstières èt contatant k’on l’z’îs a volè leûs portefeuyes.
C’est la k’on vèt po l’prumî côp Johny Weismuller, lu futur Tarzan, gangnè lu médaye d’ôr an natacion.

An mil noûv çant vint’ yût’ a Amsterdam. C’èst la ku po l’prumî côp on va vèy lu flame olimpike…ki n’est nin co pwartée dins tos les payîs pas des coureûs.
Lu baron de Coubertin, dins su discoûrs continue du dire k’i n’vout pon d’fèmes dins les djeûs èt ku c’èst conte su volontè k’on les î a fêt intrè.

An mil noûv çan trante deûs a Los Angeles, on intur dins lu jigantisse amèrikin. On stade du 105 000 places. Musike èt dèfilés : 150 tchanteûs, 300 muzicyins des orkèsses ôs cate cwins, 3 000 djins pol l’cérémonie ki droûve les djeûs.
Lu scandale, c’est ku des coureûs come Nurmi èt Ladoumègue sont rfuzès pask’ils ont couru po des sous. Kwè dîre ôdjoûrdu ?

An mil noûv çant trant chîj a Berlin lu scandale arive cand Hitler kite lu tribune po nin sèrè l’mwin d’on nwâr amèrikin, Jesse Owens, k’a gangnè lu 100m, lu sôt an longueûr èt lu 200m avou on rcôrd ki va durèt vint’ ans.

Lu guère du 40/45 :les batayes ramplassant les djeûs.

An mil noûv çant carante yût’ a Londres c’èst, dis’t-on, les djeûs dol pês rutrovue. Les Almands n’ont nin stî invitès, les Japonès non pus, les Russes nu sont nin prètes…mês lu Chine est la.
Deûs Beljes s’î distingant.
Gaston Reiff ki va bate Emil Zatopèk an 5 000m èt Étienne Gailly ki intur lu prumî dins l’tunèl du l’intrée do stade, la il a one dèfayance tèribe, i n’ sét pus d’où ç’k’il èst ni do ké costè couru. Il èst dèpassè pa Cambrera ki gangne.

An mil noûv çant cincante deûs a Helsinki, c’est lu Finlandès Nurmi ki inture avou l’flame. Diqcalifiè dupouy vint’ ans po avèr sutî payè po couru, il est rcî pa one ovacion formidâbe. Bèle ruvintche.
Zatopèk va gangnè lu 10 000m, lu 5 000m èt co l’maraton.
Lu ciclisse bèlje André Noyelle va rapwartè lu médaye d’ôr so route.

An mil noûv çant swassante a Rome…pon du scandale.

An mil noûv çant swassante yût’ a Mexico lu scandale arive noûv djoûs avant les djeûs : inspirée pa les ètudiants d’ Paris, one révolte d’ètudiants est mâtée pa l’police ki tire dudins, twas çants touwès èt des çantin.nes dins les prîjons…malgré ça on fêt les djeûs sins manifestacions. C’èst cop pî k’avou les tibétins ôdjoûrdu, èt nolu n’a côzè du boyicotè…on a fêt les djeûs come si rin n’èstèt.
Martin Luther King èt Robert Kennedy sont assassinès on ponk avant. Po dènoncè lu sôrt k’est fêt ôs nwârs amèrikins, les deûs coureûs nwârs, Smith èt Carlos, k’ont gangnè, montant sol podium po rcîre leû médaye avou on gant nwâr, des tchôses nwâres èt on foulard nwâr,èt cand on djoue l’hymne amèrikin is stindant lu brès èt l’pougne gantè tot bachant l’tièsse po nin rwêtè lu drapô ki monte o mat.

An mil noûv çant sèptante deûs a Munich. Lu najeûs amèrikin Mark Spitz va gangnè sèt’ médayes d’ôr an natacion. A Mexico, i n’avèt rin gangnè, i s’a antrinnè a mak durant catr’ ans . Vla bin one des rêzons k’i n’fôt nin boyicotè les djeûs, c’èst privè des sportifs du ramassè des médayes après des anéyes du fwaces, d’antrin’mint èt d’travay.
Prumî scandale : les baskèteûs amèrikins batus pô Russes pa 51 a 50, nu passant nin al cérémonie du cloture.
Médaye d’ardjin po l’Bèlje Karel Lismont an maraton.
Drame scandaleûs èt sanglant dins lu viyâdje olimpike lu 5 sètambe. On comando tèrorisse palèstinyin mousse dins les tchambes des Israélyins. Mwintes Israélites vont couru voy mês i gn’a ddja on mwârt èt noûv otâdjes. Al fin d’one djoûrnéye du négociacions intur les tèrorisses do comando « sèptambe nwâr » èt l’ gouvèrnumint almand ça va s’tèrminè dins l’sang.Twas hélicoptères duscolant do viyâdje olimpike po l’aéropôrt Furstenfelbruck. Dudins i gn’a les tèrorisses palèstinyins, les otâdjes israélyins èt des oficièls almands. Les hélicoptères atèrichant dins nwâre nut’ mês dirèctumint des fuzées blamantes s’alumant d’ tos costès po ascléri lu nwâre nut’. Des tireûs d’élite almands touwant les tèrorisses mês cès ci ont l’tins du vudè leûs mitrayètes so les otajes. Dîsèt’ mwârs.

An mil noûv çant sèptante chîj a Montréal.
Ça kmince bin. Boyicotâdje des djeûs pa dîj yût’ pays d’Afrike : Éjype, Gana,Kénya, Nijéria, Soudan, Libîe, Ouganda, tchad…ki n’vlant nin rascontrè lu Novèle Zélande k’a stî djouwè o rugbi an Afrike do Sud d’oû ç’ku lo’Aparteid èst mêsse.
Les djeûs sont one grande kêsse du rèzonance, on l’a ddja vèyu mwinte côps èt ç’n’èst nin fini.
Deûs médayes d’ârdjin po l’ Bèlje Yvo Van Damme an 1.500m èt an 800m.
Médaye d’ôr po l’Bèlje Karel Lismont an maraton.
N’avéz nin atindu côzè du Nadia Comanècci, lu « fée du Montréal » an jim’mastike.

An mil noûv çant catrevint a Moscou. Des grands payîs ont boyicotè les djeûs du Moscou, pokwè ? Pasku l’URSS a moussè an Afganistant. Les USA èt l’Almagne du l’ouest n’î vont nin, rindant mwês èt rèvoltès les atlêtes du leû payîs ki s’ont antrin.nè durant catr’ans po rin.
Cat’ mil cink çant èfants donant one dèmontracion du jim.mastike du masse a l’intrée dol flame èt one fièsse folklorike groupant les kinze républikes atint lu pèrfèc.cion.
Lu Bèlje Robert Van de Walle prind one médaye d’ôr an judo.
Les Bèljes comptint so Karel Lismont o maraton mês i n’a fet ku nouvime.

MORALITÈ :
Gn’a todis oyu des tchinisses èt des mwês coutcheûs po foute lu bordèl partout o momint des djeûs olimpikes. Chake côp i gn’a oyu des cis po propozè lu boyicotâdje, chake côp i gn’a oyu des cîs conte çu métôde d’aspâtchè les djeûs. Mês a chake côp les djeûs ont oyu leû place malgré to avou sovint des scandales tins des djeûs.
Lu côp ki vint dju vèrans les avantures dol flame ki va s’mostrè pol l’prumî côp an mil noûv’ çant vint yût’ a Amsterdam mês i gn’avèt co pon du pwarteûs dol torche dupouy èt a pôrtî dol Grêsse.

Lu flame olimpike (2)

An mil noûf çant swassante yût’ , a Mèxico, i gn’a oyu on drame bin pî ku l’ci do Thibèt ç’t’anéye ci…ô mwin tot si pî.
L’anéye avèt ddja mô cmincè pa des drames èt des émeûtes :
Lu cat’ d’avrî, Martin Luthèr King avèt stî assassinè dèclanchant des révolucions dins totes les vayes des Etats-Unis.
O mwè d’ mê, c’èstèt lu révolucion des ètudjants a Paris
O mwès d’ jun, lu sénateûr Kènèdy esr assassinè a Los Angèlès.
An sètambe a Mexico, vaye tchèzîe po les Djeûs olimpikes, one bataye intur les ètudjants èt les policiés fait ddja dîj ût’ mwârts. Lu twas octôbe, noûf djoûs avant lu cminçmint des djeûs c’est l’ massake dol place des Twas Cultures. Des policiés an civil s’avint mètu a l’afut ôs vites des môjons tot ôtoû dol place èt avint mitrayè les ètudjants. Oficièlmint on n’anonce ku carante mwârts mês l’vèritè c’est ki n’gn’a oyu du pus d’ twas çants. Tos les ètudjants ki trin.nant foû sont ramassès so les voyes èt fêt prîjnîs èt rason.nès dins des prîjons fwârt long dol capitale.
I gn’a pon oyu du manifèstacion po les ètudjants touwès mês i n’gn’a oyu one pa deûs champyons nwârs amèrikins, Tommy Smith èt John Carlos, k’ont stindu leûs mwins gantéyes du nwârt so l’podjom’ po rcîre leûs médaye o momint du l’hyme amèrikin , dusnonçant lu discriminacion conte les nwârs dins les États-Unis.
Come du ç’tins la les médias n’èstint nin co dèvlopès, on n’a wêr côzè èt les djeûs s’ont bin passès.

Mês avou l’Thibet, les grands gueûyôs des dwas d’l’ome èt les journalisses ki kèrant on skoup’ ont rmouwè tot po ku tortos saviche bin come ça s’a passè. Et avoû ça vla nosse planète compéye a deûs. Les cis ki sont avou l’Chine èt les cis ki sont conte lu Chine. Cand l’flame va passè dins on payîs anti, les policiés vont rondinè les cis ki sayant du dustinde lu flame. Cand l’flame va passè dins on payîs pro, les policiés vont tni bin long do passâdje les kékes hardis ki wazrint èsse conte lu flame.

Ça a cmincèt a Londes mês les mineûs do cortèje ont stî sotnis pal police. Avou l’France, a Paris, lu mêre, Bèstrand Delanoé, po s’mète des plumes o dos, avèt dèssinè on bê parcours dins s’ vaye. Djondu valèt, bramin du tes élècteûrs nu sondjint nin come twè. Gn’a des cis ki s’coutchint sol voye po arètè l’cortèje, des cis k’ont min.me parvènu a dustinde lu flame èt l’bê parcours prévu a stî racoûrci on fameûs côp èt ça n’a nin passè pa l’mêrîe. On côp dins l’êwe po Bèrtrand ! Mês ça a mankè du divizè lu France èt L’Chine. Il a falu ku Sarkozy s’ècsplikiche avou l’prumî minisse chinwas èt on minisse francês a stî s’ècscuzè a Pèkin. On’ onte rézultat : cand les Francès ont dèfilè a l’ouvèrture des djeûs, lu yût’ d’aousse, ils ont stî choflè pô Chin’was tandis k’les onts payîs èstint tchakès.

Lu pus rêzonâbe, c’est co lu Dalaï Lama ki n’prind nin pozicion po l’sabotâdje des djeûs, o contrêre, èt ki vout discutè avou les mêsses dol Chine. Ça a pris mês kwès’ku ça a donè, nolu nu l’sé. Nin grand tchônze.
Malgré tot, lu flame a passè partout come prévu mês avou des parcours tchandjès ou racourcis.
Dins les payîs pro èt dins les provinces chinwâzes, i gn’a wêr oyu d’problème…sôf o Thibèt, mês èle a passè cand min.me. Les Chin’was ont min.me pwartè l’flame al copate du l’Éverèst èt dins one du leûs provinces ki vnèt d’èsse sutôréye pas on tramblumint dol tinre èt avèt fêt bramin des mwârts èt dustru des çantin.nes du môjons.

Jacques Rogge, président do comité olimpike intèrnacional a dmandè ôs payîs du l’ouwèsse du n’pus atakè lu Chine so les dwas d’l’ome jusse avant ku l’flame n’intriche dins les deûs Corée. Sondjant on pon, dis’t-i, ki nos a falu deûs çant ans po tchandjè après l’révolucion francèsse èt k’an mil noûf çant carante noûf lu Bèljike, l’Angletêre èt l’Portugal ecsplwatint co des colonies èt l’z’î ont seûlmint dnè l’indépandance an swassante. Chovans duvant nosse t’uche.

Kim Gevaert, lu champione bèlje des çant èt deûs çant mètes rèclame lu dwa po les sportifs, ki n’s’ocupant nin du politike. Èle dumande k’on lèyiche les sportifs fére leûs djeûs ki prèparant du pouy catre ans.

Dins les payîs pro come lu Tanzanîe, ça a stî one grande fièsse lu passadje dol flame. So on parcours du cink kilomètes catre vint pwarteûs ont fêt durè l’plêjî : ils ont mètu one bone eûre po fére lu tchmin..

Après avèr parcouru çant trante sèt’ mile kilomètes dins les mwins du vint mile pwarteûs, tos des sportifs, lu flame olimpike a achèvèt su tchmin d’cwas dins les brès d’on coureû dins l’vude a mwinte mètes du yon dins lu stade do Nid d’oûjê a Pékin po alumè lu grande tortche ki va brûlè tote lu duréye des djeûs

Catre vint chèfs d’Etat ont assistè al grande fièsse do yût d’aousse. Angèla lu Jèrmanike n’î èstèt nin lèye.

Lu yût d’aousse al l’fièsse du l’ouvèrture des djeûs, lu Chine a mostrè du ç’k’ èle èstèt capâbe du réalizè. Bin sûr ki gn’a des djins ki sofrant an Chine…èt dins nosse payîs, i’n’gn’a pon, kék’ fî ? Bramin ont dandjî des dwas d’l’ome ossi èt on les rovî.

MORALITÈ : Les tchins bawant mês lu cortêje passe
.